Aqtóbede lańkestikti nasıhattaý nemese lańkestik aktisin jasaýǵa jarıa túrde shaqyrý qylmystyq quqyq buzýshylyǵyn jasaǵany úshin úsh adamǵa qatysty bas bostandyǵynan aıyrý úkimi shyǵaryldy, - dep habarlaıdy Qamshy.kz QazAqparatqa silteme jasap.

Sotta anyqtalǵandaı, T.B.Májıtov telekomýnıkasıalar jelilerin paıdalana otyryp, terorızmdi nasıhattaý nemese terorızm aktisin jasaýǵa jarıa túrde shaqyrý maqsatynda, 2015 jylǵy tamyz aıynda «VKontakte» áleýmettik jelisinde «Abýholıd Abdýmadjıd» atymen ózine jeke paraqsha ashqan. Osydan keıin ol tanystaryna qarjylyq kómek jasaý týraly mátinder taratqan. Odan ári, Májıtov 2015 jyldyń 7-10 jeltoqsan aralyǵynda terorızmdi nasıhattaý maqsatynda  dostaryna  «Ýaqyt keldi ahı», «Assalam ýaleıkým ahı bizdiń ýaqyt keldi In sha Allah», «Qansha júre beremiz ahı» degen mazmundaǵy úndeý týraly hat jazyp, ózin-ózi jaryp «shahıd» jasaý týraly beınerolıkter jibergen.

Budan soń, T.B.Májıtov Shalqar aýdanynyń turǵyndary E.A.Amanǵojın men M.S.Turǵanbaevpen telekomýnıkasıalyq jelilerin paıdalana otyryp,  lańkestikti nasıhattaǵan, sondaı-aq terorızm aktisin jasaýdy jarıa túrde «Whats app» áleýmettik jelisi arqyly taratqan kórinedi.

Sot sheshimimen Májıtov kináli dep tanylyp, múlkin tárkilep,  segiz jyl merzimge bas bostandyǵynan aıyrý jazasy belgilendi.  Jazany óteý jeri retinde túzeý kolonıasynyń jalpy  rejımi  aıqyndaldy. Osyndaı jaza Amanǵojınge de taǵaıyndaldy. Al Turǵanbaev múlkin tárkileýmen 6 jyl 6 aıǵa sottaldy.