Shyǵystanýshy Nurlan Álnıazov salafızm men saentologıanyń uqsastyqtary bar ekenin aıtady. 365info.kz saıtyna bergen suhbatynda shyǵystanýshy Qazaqstanda áli de dinı ekstremızm máselesin orasan zardaptarsyz sheshý múmkindigi bar dep sanaıdy.

«Kez-kelgen óz senimi men dinin ǵana durys dep sanaıtyn sekta qoǵam úshin óte qaýipti. Ondaı sektalarda basqa aǵymdaǵylardyń múlki, tipti, ómiri de esh qunsyz sanalady. Qazaqstanda biz salafızmniń nyǵaıyp kele jatqanyn kórip otyrmyz. «H» saǵaty kelgende, olarǵa syrttan qandaı da bir pármen túskende naǵyz problemalarǵa kez bolamyz. Ol kezde kem degende qoǵamdy bólshektep tynamyz. Áıtpese, Tájikstandaǵydaı dinı jáne zaıyrly turǵyndar arasynda azamattyq soǵys bastalyp ketýi de múmkin. Ol qandy qyrǵyndardy eshqashan umytpaý kerek. Sonymen birge, úreıge salynýǵa da bolmaıdy. Ázirge máseleni beıbit sheshýdiń joldary bar», - degen N. Álnıazov Din isteri komıteti men Qazaqstan musylmandarynyń dinı basqarmasyn reformalaý qajettigin aıtady.

Sondaı-aq, shyǵystanýshy sheneýnikter men memlekettik organdar qyzmetkerleriniń dinı aǵymdar quramynda bolýynan qaýiptenedi.

«Qazaqstan sheneýnikteriniń dinı aǵymǵa enýge quqyqtary joq. Ol – qaýipti. Eger kez-kelgen ekstremıstik uıymnyń qyzmetine úńilsek, onyń eń birinshi maqsaty – qataryna kim ekenine qaramaı, kóptep adam tartý ekenin kóresiz. Keıin músheleriniń sapalyq kórsetkishterine kóńil bóle bastaıdy. Ol kezde barynsha baı kásipkerlerdiń, olıgarhtardyń, tanymal sheneýnikterdiń balalaryn tartýǵa áreket jasaıdy. Keıde tipti sheneýnikterdiń, saıası qaıratkerlerdiń ózderi álgindeı aǵymdarǵa erip ketip jatady. Áńgime tek salafızm týraly emes. Saentologıa da solaı jumys isteıdi. Bul neni bildiredi? Bul bastapqyda turmystyq sıpattaǵy máseleniń saıası oıynǵa aınalatynyn bildiredi», - deıdi ol.