Bir nárse aıqyn: Qazaqstan ekonomıkasy men saıası júıesi dál búgingideı ókilettigi bar «ekinshi elbasyn» kótere almaıdy! Sondyqtan da qazirgi prezıdent óziniń ýysyndaǵy bılik ókilettikterin parlament, úkimet, sot arasynda qaıta úlestire bastaǵany durys bolar edi. Bir sózben aıtqanda, bir adam emes, máselen, 300 depýtattan turatyn, quramyna qoǵamda bar barlyq kúshter engen myqty parlament Qazaqstan bolashaǵynyń kepili bola alady! Bir sózben aıtsam, dál qazirgi saıası júıe Nazarbaevsyz qyzmet ete almaıdy! Óıtkeni bizdegi barlyq memlekettik ınstıtýttar prezıdenttiń jeke basyna qyzmet etý úshin qurylǵan. Sondyqtan osy tarıhı tyǵyryqtan shyǵýdyń bir ǵana joly bar: bir adamǵa ǵana baǵyshtalǵan jartykesh júıeni ózgertý kerek.Erte me, kesh pe, ol júıe ózgeretini belgili, sebebi kez kelgen avtorıtarızm óz túbine ózi jetedi, oǵan tarıh kýá.Sondyqtan qazirgi prezıdenttiń aldynda uly tańdaý tur: ne sol ózgeristerdi ol ózi bastap, óz qolymen júzege asyrady, ne ol ózgerister onyń qatysýynsyz ótedi! Óz basym alǵashqysyn qalar edim. Óıtkeni ekinshi múmkindiktiń arty qıyn bolyp ketýi ábden múmkin.Menińshe, qazir qoǵamda da, bıliktiń óz ishinde de alǵashqy nusqany qoldaýshylar barshylyq. Sonda ǵana Nazarbaev sekildi shyn mánindegi Patrıarhtyń kúzi Qazaqstannyń aıazdy qysyna emes, jasampaz kóktemine ulasar edi. Biraq ondaı qadamdarǵa prezıdent óz erkimen bara ma? Álde ashynǵan halyq bılik týraly máseleni onsyz, ózi sheship tastaı ma? Mine, gáp sonda!