Búgin Brazılıanyń Rıo-de-Janeıro qalasynda ótip jatqan Olımpıada oıyndary bel ortasynan aýdy. Ókinishke qaraı, bul kúni de Qazaqstan qorjynyna medal buıyrmady, - dep habarlaıdy Qamshy.kz QazAqparatqa silteme jasap.
Búgin jarys jolyna shyqqan akademıalyq eskek esý jeke saıysynda qazaqstandyq sportshy Vladıslav Iakovlev 7:21,61 nátıjemen 31-orynǵa taban tiredi. Osylaısha, ol júldege talasý múmkindiginen aıyryldy.
Al 50 metrden vıntovkamen jatyp atý saıysynda Iýrıı Iýrkov ta fınalǵa óte almady. Ol bar bolǵany 621, 4 upaı jınap 25-shi orynǵa turaqtady.
Sonymen qatar, dısk laqtyrýdan A tobynda óner kórsetken taǵy bir otandasymyz Evgenıı Labýkov ta biz kútken nátıjeni baǵyndyra almady. Ol fınalǵa ótý úshin 65 metr 50 sm-ge dısk laqtyrýy kerek edi. Alaıda, bul mejeni eki sportshy ǵana baǵyndyra aldy. Al qazaqstandyq sportshynyń shamasy bar bolǵany 55,54 metrge laqtyrýǵa jetti. Osylaısha, jarysty óz tobynda 15-shi bolyp aıaqtady.
Búgin sonymen qatar, jeńil atletter arasynda 20 shaqyrym qashyqtyqta sporttyq júristen jarystar ótti. Onda qazaqstandyq Georgıı Sheıko 34-shi bolyp, meje syǵyn kesti. Bul saıysta otandasymyz 20 shaqyrym qashyqtyqty 1:23:31 ýaqytta keldi. Alaıda, jeńis tuǵyrynan kórinýge tym tómen jetistik edi.
Al búgin jarys jolyna boksshylarymyzdan tek Jánibek Álimhanuly ǵana shyqty. Qarsylasy da osal boksshy emes edi. Alaıda, qazaqtyń qaısar uly qarsylasyn aıqyn basymdylyqpen utyp, shırek fınalǵa joldama aldy. Bul Olımpıada oıyndarynyń medaline bir taban jaqyndady degen sóz.
75 keli salmaqta el namysyn qorǵap jatqan qazaq boksshysy Jánibek Álimhanuly Aljır boksshysy Ilás Abbadıdi 3:0 esebimen taza utty.
Soqqylary da qarsylasynyń kózdegen jerine dóp tıip jatty. Osy boksty tamashalaýǵa kelgen Rıo turǵyndary men qonaqtary qazaq azamatynyń myqtylyǵyna túregep turyp qol soqty. Osylaısha, búgingi jarys kúni Jánibektiń shırek fınalǵa ótken jarqyn jeńisimen este qaldy.
Al taǵy bir medal alady-aý degen aýyr atletimiz Denıs Ýlanov 85 kelige deıingi salmaqta synǵa túsip, qos jattyǵýdyń qorytyndysy boıynsha 390 kelini baǵyndyrdy. Alaıda, bul ony jeńis tuǵyryna kóterilýine azdyq etti.
Aýyr atletıkadan bul salmaqta Olımpıada altyny qos jattyǵýdyń qorytyndysy boıynsha ırandyq Kıanýsh Rostamı (396 keli) alsa, kúmis júlde qytaılyq Tán Taoǵa (395 keli) buıyrdy. Qola júlde erejege sáıkes, Denısten salmaǵy jeńil bolǵandyqtan rýmynıalyq Gabrıel Sınkraıannyń (390 keli) enshisinde ketti. Ýlanov Olımpıadany tórtinshi orynmen aıaqtady.
Sondaı-aq, búgin áıelder arasynda 100 metr qashyqtyqqa júgirý saıystary ótti. Onda el namysyn qorǵaǵan Rıma Kashafýtdınova irikteý kezeńinde 11, 84 sekýndpen 7-oryndy mise tutyp, ol jarys jolynan shyǵyp qaldy.
Sonymen birge, taǵy bir jelaıaǵymyz Vıktorıa Zábkına da irikteý kezeńinde 100 metrdi 11, 69 sekýndpen júgirip ótip, nátıjesinde 5-orynǵa turaqtap, jartylaı fınalǵa shyǵa almady. Osy qashyqtyqta óner kórsetken taǵy bir otandasymyz Olga Safronova da jartylaı fınalǵa jetpeı súrindi.
Eske sala keteıik, jarystyń alǵashqy kúninde dzúdodan erler arasynda 60 kelige deıingi salmaq dárejesinde synǵa túsken Eldos Smetov el qorjynyna kúmis júlde salsa, 48 kelige deıingi salmaqta áıelder arasynda jarysqa qatysqan Otgonseseg Galbadrah Olımpıada oıyndarynyń qola júldegeri atandy. Al úshinshi medaldi qorjynǵa aýyr atlet Farhad Harkı saldy. Ol erler arasyndaǵy 62 kelige deıingi salmaq dárejesinde óner kórsetken bolatyn. Olımpıadanyń tórtinshi kúni taǵy bir aýyr atlet qyzymyz Karına Gorıcheva 63 keli salmaqta tórtinshi medaldi el qorjynyna salsa, Olımpıadanyń besinshi kúni eki aýyr atletimiz Nıdjat Rahımov pen Dmıtrıı Balandın 200 metr qashyqtyqqa júzýden eki altyndy jeńip aldy. Al osy kúni áıelder arasynda synǵa túsken aýyr atlet Jazıra Japparqul kúmis júldeger atandy.
Taǵy da aıta keteıik, búgin Qazaqstan quramasy 2 altyn, 1 kúmis, 3 qola medalmen jalpykomandalyq esepte 14-orynǵa syrǵydy.
