Almaty qalasy Almaly aýdyndyq ishki ister basqarmasy qyzmetkeriniń týysy 18 shilde kúni polısıa qyzmetkerlerine jasalǵan shabýyldyń jaı-japsaryn aıtyp berdi, - dep habarlaıdy Qamshy.kz «Shyn» portalyna silteme jasap.

Portal redaksıasyna atyn atamaýdy surap hat jazǵan ol sol kúngi oqıǵanyń qalaı bolǵanyn baıandapty.

«Meniń inim – polısıa qyzmetkeri. Qylmysker shabýyl jasaǵan Almaly aýdandyq ishki ister bólimshesinde jumys isteıdi. Dál sol kúni ol bir tapsyrmalarmen qalada júrgen. Terakt týraly alǵashqy habar WatsApp-pen taraı bastady. Záremiz ushyp inimizdiń amandyǵyn tiledik. Ózi qany qyzbalaý, urynshaqtaý edi. Áıteýir, Qudaı saqtady.

Qaza bolǵan jigitterdiń otbasylaryna qaıǵyryp kóńil aıtamyn. Árıne, mundaı jaǵdaıdy eshkimniń basyna bermesin dep tileısiń ǵoı. Endeshe, mundaı qaıǵyly jaıttar bolashaqta qaıtalanbas úshin bes qarýdy serik etken saqshylarymyz qalaısha op-ońaı oqqa ushyp, jalǵyz qylmyskerdi toqtatý úshin qanshama bozdaq jan qıdy degen máselege oılanyp kórsek. Men ishki ister organdaryndaǵy ahýaldy jaqsy bilemin. Qudaı ózi keshirsin, degenmen, álgi marqum bolǵan jigitterdiń kópshiligi jol-patrýldik polısıa jasaǵyna 5 myń dollar para berip kirgen. Kóptegen polısıa qyzmetkerleri myltyq ata bilmeıdi. Polıgonǵa jylyna bir-eki ret barsa, soǵan da shúkir. Bólimshede otyryp tergeýshi bolyp jumys isteıtin jigitterdiń ishinde qolyna myltyq ustap kórmegender bar.

Álgi qylmysker Rýslan esik aldyndaǵy ótkizý-tekserý pýnktindegi polısıany atyp, onyń qarýyn alyp ǵımaratqa kirýge júgirip kelgen. Tek kire beriste syrtqa shyǵyp bara jatqan adammen betpe-bet kelip qalady. Anaý ony ótkizip jiberemin degenshe magnıti bar temir esik jabylyp úlgerip, kezekshi bolyp otyrǵan polısıa qyzmetkeri esikti qulyptaıtyn knopkany basa salyp, tórt aıaqtap qashqan. Abyroı bolǵanda magnıti bar bul esiktiń ornatylǵanyna da bir-eki-aq jyl bolǵan. Sol esikti asha almaıtynyn túsingen qylmysker ǵımarattyń ishine beı-bereket oq jaýdyryp syrtqa shyǵyp ketken. İnimniń aıtýynsha, ǵımaratta bolǵan teregýshileri bar, basqalary bar, tolyp júrgen qyzmetkerlerdiń bireýi dálizge shyǵa almaǵan. Bári kabınetterinde tyǵylyp otyrǵan. Sebebi, kópshiliginde qarý bolmaǵan. Ana magnıtti esik bolmaǵanda qylmysker búkil bólimsheni jaıratyp tastar edi. Osy oraıda, qylmyskerdi birden toqtatýdyń alǵashqy múmkindigin kezekshi bolyp otyrǵan qyzmetker jiberip alǵanyn eskerip qoıyńyz. Onyń álde qarýy bolmaǵan, álde ol jedel sheshim qabyldap úlgermegen.

Qylmyskerdi zalalsyzdandyrýdyń kelesi múmkindigi ony artynan qýyp barǵan  eki polısıada boldy. Alaıdy, ókinishke oraı, árqaısysy tapanshalaryndaǵy 6 oqty túgese atyp, 12 oqtyń birin de (İİO qyzmetkerleri qoldanatyn Makarov tapanshasy 8 oqpen oqtalady - red.) daryta almaǵan. Al, qylmysker ekeýin de jaıratyp ketken. Onan soń Tóle bı-Abylaı han kósheleriniń qıylysyna jaqyn jerde oqqa ushqan jol-patrýldik polısıasynyń eki qyzmetkeri qylmysker qastaryna kelgende kólikterinde uıyqtap jatqan. Qyzmette júrgen kezde uıyqtaýdyń qandaı qaýipti ekenin osydan kórýge bolady. Sol mashınada bolǵan úshinshi qyzmetker bul kezde dárethanada júredi. Sóıtip ol aman qalady. Ol da Rýslandy toqtata almaǵan. Sebebi, kóliktegilerdiń de, onyń da kabýralary bos bolǵan kórinedi áriptesteriniń aıtýynsha. Iaǵnı, qarýsyz júrgen», - degen ol el aýmaǵynda lańkestik qaýiptiń «sary deńgeıi» engizilgen ýaqytta polısıa qyzmetkerleriniń jaıbaraqat júrgenine qynjylady.

Sondaı-aq, hat avtory sońǵy ýaqytta ishki ister organdaryn paraqorlyq pen salǵyrttyq jaýlap alǵanyn aıtady.

«Endi oılap qarańyzdarshy, elimizde Aqtóbedegi teraktiden keıin terrorlyq qaýiptiń sary deńgeıi eńgizilip, saqshylardyń saqtyǵy kúsheıtilip, bes qarýlary túgendelip, kóshede saýyt kıip júrýi tıis kezde sonshama qyzmetkerdiń qyrylyp qalýy neniń belgisi?

Bul polısıa oryndaryn paraqorlyq pen salǵyrttyq jaılap alǵanyn kórsetpeı me! Jalpy, Qasymov myrza mınıstr bolyp kelgeli ishki ister organdaryn bereketsizdik jaılap aldy. Tártip joq. Qadaǵalaý joq. Polısıa qyzmetkerleriniń turaqty dene shynyqtyrýmen aınalysyp, únemi qarý atyp jattyǵýy degen umyt bolǵaly qashan. Jemqorlyq jaılap bitken», - deıdi polısıa qyzmetkeriniń týysy.

Qandy oqıǵanyń qalaı bolǵanyn baıandaǵan ol hatyn: «Mine, meni ashyndyratyn osy másele. İnimniń el-jurttyń tynyshtyǵyn qorǵap saqshy bolyp júrgenin maqtan tutamyn. Biraq, onyń basyna tónýi múmkin qaýipti oılasam uıqym qashady. Meniń janaıqaıymdy túsinińizder. Polısıamyz bekem bolmasa, qaýipsizdigimiz qyl ústinde turady ǵoı», - dep qorytyndylaıdy.

Esterińizge salsaq, qolǵa túsken kúdikti R. Kúlikbaev tergeýshilerge "Polısıa ǵımaratynda temir esik bolmaǵanda, qurbandar sany áldeqaıda kóp bolar edi" dep aıtqanyn buǵan deıin de jazǵan bolatynbyz.