Qazaqstandyqtar Rıo-de-Janeıro Olımpıadasynyń fınalynda ádiletsizdikpen jeńilis tapqan boksshy Vasılıı Levıtke «altyn medal» jasap berýdi sheshti, - dep habarlaıdy Qamshy.kz QazAqparatqa silteme jasap.

«Facebook-tegi halaıyq! Biz búgin túnde olımpıadalyq jalǵandyq pen qastandyqtyń kýágeri boldyq. Boks jekpe-jeginde bizdiń chempıon Vasılıı Levıt óz qarsylasynan bir saty joǵary boldy. Tóreshiler reseılik boksshy Tıshenkoǵa ádiletsiz jeńis syılady. Áýesqoı bokstaǵy jemqorlyq aýqymdy kólemge jetti», - dep jazdy tanymal bloger Ǵalym Baıtoq.  - Men reseılik saıttardy súzip shyqtym, onda reseılikterdiń ózderi de otandasynyń bul jeńisi jalǵan ekendigin moıyndap, Vasılıı Levıtti chempıon dep atady! Munda shyndyq bar jáne sport tarıhynda tóreshilerdiń qastandyq etýinen japa shekken sportshylarǵa adamdar halyqtyq marapat kórsetken kezder az emes! Osy oraıda, oryn alǵan ádiletsizdikke baılanysty, Vasılıı Levıtke «Halyqtyn súıiktisi» ulttyq marapaty aıasynda «Halyqtyń chempıony - Narodnyı chempıon» ataǵyn berip, Rıodaǵy Olımpıada júldesi stılinde oǵan ALTYN MEDAL tabystaýdy usynamyn!».

Ǵalym Baıtoktyń aıtýynsha, QR Ulttyq bankiniń Teńge saraıy atalmysh medaldi altynnan aptap berýge daıyn. Onyń quny 1 mıllıon teńgege shyǵady eken.

«Medal halyqtyq sıpatqa ıe bolý úshin jáne ony barsha halyq atynan tabystaý úshin atalmysh qarajatty halyq bolyp jınaýdy usynamyn», - delingen onyń Feısbýktegi paraqshasynda.

Medaldiń dızaınyn tanymal músinshi ári dızaıner Oljas Muhamedıuly jasap berýge ýáde etken.