«Qazatomónerkásip» UAK» AQ enshiles kásiporyny «Úlbi metalýrgıa zaýyty» AQ «Úlbi demalys bazasy» JSHS-niń 100% qatysý úlesin satýǵa shyǵardy.
Kompanıanyń qoǵammen baılanys departamentiniń habarlaýynsha, «Úlbi demalys bazasy» JSHS qaramaǵyna Óskemen qalasynan 75 shaqyrym qashyqtyqta, Shyǵys Qazaqstan oblysyndaǵy «Tórt-qara» kóliniń jaǵalaýynda ornalasqan «Sıbıny» demalys bazasy jatady. Kásiporyn demalys uıymdastyrý, mádenı-saýyqtyrý sharalaryn ótkizýmen shuǵyldanady.
Atalǵan nysandy saýdalaý baǵa kóterý ádisi boıynsha ústimizdegi jyldyń 16-tamyz kúni Memlekettik múlik reestriniń gosreestr.kz veb-portalynda, Astana ýaqyty boıynsha saǵat 12:00 bastalady. «Úlbi demalys bazasy» kásiporynynyń bastapqy quny 345 509 000 teńge.
«Saýda «Samuryq-Qazyna» ulttyq ál-aýqat qory» aksıonerlik qoǵamynyń jáne daýys berýshi aksıalarynyń (qatysý úlesteriniń) elý paıyzdan astamy tikeleı nemese janama túrde «Samuryq-Qazyna» AQ-na tıesili bolǵan uıymdardyń «Samuryq-Qazyna» AQ Dırektorlar keńesiniń qaýlysymen bekitilgen aktıvterdi satý, qaıta qurylymdaýdyń biryńǵaı erejelerine jáne memlekettik múlik veb-portalynda múlikti satý boıynsha elektrondy saýdalar ótkizý rettemesine sáıkes júrgiziledi», delingen habarlamada.
Enshiles jáne táýeldi kásiporyndardy satý beıindi emes aktıvterden arylý arqyly «Qazatomónerkásip» UAK» AQ-nyń ekonomıkalyq qosymsha qunyn arttyrý maqsatynda júzege asyrylýda. Sondaı-aq, kompanıa óz qyzmetin tek atom energetıkasy salasyna baǵyttamaq nıette.
