Sıdneı Olımpıadasynyń chempıony, boksshy Ermahan Ybyraıymuly QazAqparatqa bergen suhbatynda osylaı depti.

- Rıoǵa qashan keldińiz?

- Ótip bara jatqan túnde keldim.

- Kimderge jankúıerlik etip keldińiz?

- Ózim boksshy bolǵan soń bylǵary qolǵap sheberlerine qoldaý kórsetý azamattyq boryshym. Biraz boksshylarymyzdyń fınaldaǵy aıqastaryn kórýge keldim. Keshe  Danıar Eleýsinov fınalǵa shyǵypty.  Mine, búgin Ádilbektiń fınalǵa ótkenin óz kózimmen kórip qatty qýanyp otyrmyn. Dychko da jartylaı fınalǵa ótti. Bul da úlken qýanysh.

- Osy úsh boksshynyń qaısysy altynǵa laıyq dep oılaısyz?

- Úsheýi de altyn jigitter. Úsheýi de altynǵa laıyq. Úsheýi de chempıon bolyp jatsa, tańǵalmaımyn.

- Keshegi Levıttiń kúmis júldesine kóńilińiz tola ma?

- Men Levıt aıqasqan kúni jolda boldym. Jekpe-jegin óz kózimmen kóre almadym. Biraq, kelgen soń osyndaǵy jigitterden estip jatyrmyn. Aıqyn basymdyqpen utyp turǵan jeńisti qalaı basqa bireýdiń alaqanyna salyp bere salady? Men tóreshilerdi túsinbedim. Eger teń dárejede óner kórsetse, qarsylasyna jyǵyp bersin. Onda meniń daýym joq. Dál endi búkil zal ǵana emes, jer sharynyń turǵyndary  kórip otyrǵan ádildikti rıngtiń túbinde otyrǵan bes tóreshi qalaı betteri búlk etpeı basqa bireýdiń ýysyna salyp berdi.

Men osyǵan deıin qanshama Olımpıada oıyndaryna bardym. Biraq, dál osyndaı soraqylyqty kórgen joqpyn. Jańa ǵana jigitterimizdiń aldynda qazaqtyń qaratory qyzy Jaına Shekerbekovanyń jekpe-jegin kórdim. Jaına jeńilgen joq. Men boksshy retinde, bapker retinde ustaz retinde qaryndasymyzdyń ár soqqysy men qoldanǵan aıla-tásilin qadaǵalap otyrdym. Qazaq qyzyna da tóreshiler qıanat jasaǵany kórinip turdy.

- Basqa basqa emes, tóreshilerdiń Olımpıada oıyndaryndaǵy mundaı "aram" áreketteri neni bildiredi?

- Bul - sporttyń lastanǵanyn bildiredi. Bul - sporttaǵy jemqorlyqty bildiredi. Bul - "sum" saıasattyń sportqa da aýyz sala bastaǵanyn bildiredi.

- Budan qutylýdyń joldary bar ma?

- Árıne! Sol qolmen jasaǵan dúnıeni oń qolmen ózgertýge bolady. Biraq, ýaqyt kerek, úlken reforma kerek.

- Eger bul úrdis jalǵasa berse ne bolady?

- Tórt jylda bir keletin jarystyń tóresi atanǵan Olımpıada oıyndarynyń bedeli joıylady. Qazir bireýler Olımpıadaǵa qatysýdy armandap júrse, keıin Olımpıadaǵa barýdan bas tartatyn bolady. Búgin Levıt búgin ádiletsizdiktiń qurbany boldy, erteń de solaı bolmasyna kim kepil. Osyndaı ádiletsizdikterden qanshama jas sportshylar janyp ketip jatyr. Jeńip turǵan sportshydan jeńisti tartyp alý degen sóz - onyń azamattyǵyna, adamdyq quqyǵyna qol suǵý degen sóz. Sol sportshyny qorlaý degen sóz. Tek sportshyny ǵana emes, ol sportshy qaı eldiki bolsa, sol eldi de qorlaý dep túsinemin.

- Áńgimeńizge rahmet!