Adam qandaı ózi? Bilip bolmaısyń. Ózgeniń kemshiligin izdeýge sheber, óziniń kemshiligin kórmeıdi. Ózgeni tabalaýǵa sheber, óziniń qateligin moıyndamaıdy. Osylaı ótedi ómirimiz. Aqyn Asylzat Arystanbektiń myna bir jyly jazbasy kóptiń kókeıine oı salar degen pikirdemiz dep jazady 365info.kz.
Buryn maskúnem bolyp, batpaqqa batyp jatatyn adamnyń bir kúnderi tap-taza, muntazdaı, namaz oqyp júrgenin kórsek, «dindar bola qalypty ǵoı, kezinde qulap iship júretin edi» dep tabalaımyz. Onyń túzelgenine qýanbaımyz.
…
Únemi jumystan qýylyp, joly bolmaıtyn adamnyń kúnderdiń kúninde bir mekemeniń bastyǵy bolyp otyrǵanyn kórsek, kúndeımiz. Baıaǵyda jumysqa turaqtamaıtyn edi, shirenip bastyq bop qapty dep. Odan osyndaı jetistikke jetý úshin ne istegenin suramaımyz.
…
Birneshe ret shańyraq kóterip, sońy ylǵı ajyrasýmen aıaqtalyp jatatyn jigittiń berekeli otbasynyń tiregi bolyp, kóp balaly áke ekenin kórsek, senbeımiz. Talaı áıeldiń obalyna qalyp edi, mynaýmen qalaı turyp jatyr eken degen kúmán turady.
…
Jetistikke jetý jolynda adam balasy san soqpaqtan ótedi. Súrinedi, qaýqary bolsa qaıta turady. Bálkim áp degennen joly bola qoımas, biraq ómirdiń árbir sátin sabaq dep bilgen adam túbi bir nátıjege jeteri haq. Eshteńe istemegen adam ǵana qatelespeıdi.
…
Meniń ótkenim men búginimdi, otbasymdy, jaı-kúıimdi, osal tustarym men artyqshylyǵymdy biletinderdiń mysqylǵa toly pikirlerin oqyp qalyp jatamyn. Túsinem. Nesine jetisip aqyl aıtyp otyr degen emeýrindi sezinem.
…
Ómir ótpeli. Meniń basymnan ótýi múmkin emes degen jaǵdaılarǵa tap bolǵanda, ókinesiń. Kezinde ózim de talaılarǵa «munyń durys emes» dep aqyl aıttym. Biraz dosymnan qatelikterin keshire almaı qol úzdim. Kóbin syrtynan áńgimeledim, tabalaǵan kezderim de boldy, jasyrmaımyn. Biraq, ómir sen qabyldamaǵan nársemen betpe-bet qaldyrǵanda, bári basqasha ekenin túsinesiń.
…
Ómir qatyp qalǵan teorema emes! Bir oqıǵa birneshe adamnyń basynan birdeı ótýi múmkin. Biraq sheshimi ár túrli.
Jazbalarym – jańylysqan sátterimnen alǵan sabaǵym. Tájirbıem. Ol da ómirdiń ár sátinde ózgerýi múmkin. Óz sózim -ózimdiki. Kádeńizge jarap jatsa — marhabat!
