Otyrar aýdanynda topyraqtyń qunarlylyǵyn arttyrý, ónimdilikti eseleý jáne tuzdanǵan topyraqty múmkindiginshe saýyqtyrý arqyly qaıta aınalymǵa qosý jumystary myqtap qolǵa alynýda.

Taıaýda atalǵan egis alqabynda aýdandaǵy egin salasyndaǵy ózekti máselelerdi sheshý, jer qunaryn arttyrý, topyraqtyń tuzdylyǵyn tómendetý maqsatynda oblystyq dalalyq semınar ótti. Semınarǵa aýdan ákimi E.Aıtahanov, aýdanymyzdyń aýyl sharýashylyǵy salasynyń ókilderinen ózge oblystyq Aýyl sharýashylyǵy basqarmasynyń basshysy S.Turbekov, Ó.Ospanov atyndaǵy Qazaq topyraqtaný jáne agrohımıa ǵylymı zertteý ınstıtýtynyń dırektory A.Saparov jáne ınstıtýt ǵalymdary A.Otarov, G.Atasheva, M.Poshanovtar qatysty.

Sondaı-aq, semınarǵa arnaıy Japonıadan Kıoto ýnıversıtetiniń profesory Fýnakava Shıná, atalǵan ýnıversıtettiń bir top magıstranttary kelip, keleli pikirleri men ǵylymı tujyrymdamalaryn ortaǵa saldy.

Basqosýda aýdan ákimi E.Aıtahanov búgingi egin egý tehnologıasyn ǵylymnyń jetistikterimen ushtastyrý kerek ekendigin basa aıtty. Sonymen birge, aýdandaǵy 368 shaqyrymdy quraıtyn drender júıesi men 55 shaqyrymdyq «Sháýildir» bas kolektory tolyq jóndeýden ótkende egis alqaby kóbeıip, Otyrar júgerisi burynǵy dańqyna qaıta ıe bolatynyna senim bildirdi.

Semınar sońynda sharýalar men semınar qonaqtary attyly kisi kórinbeıtin júgeri alqaptaryn aralap, sobyqtaryn saralap kórdi. Kórgen adamnyń kózi toıatyn júgeri alqabynyń osylaı jaıqalýy ǵylymnyń jetistigi ekendigi aıdan anyq. Ǵylym men sharýalardyń tájirıbesin ushtastyra bilgen kezde ónimniń mol bolatynyna semınarǵa qatysýshylardyń báriniń kózi jetti.