Shardarada biraz jyldan beri jumysyn toqtatyp turǵan balyq ósirý tálimbaǵy bıyldan bastap qaıta iske qosyldy. Aýdanda balyq sharýashylyǵyn damytý maqsatynda ashylǵan «Shardara balyq pıtomnıgi» JSHS-niń mamandary taıaýda Shardara sý qoımasyna shabaqtar jibere bastady. Dálirek aıtatyn bolsaq, búginde jalpy aýmaǵy 68,2 gektardy quraıtyn toǵan iske qosylyp, 15,7 mln. dana balyq balańqurttary (lıchınka) ósirilýde.

Budan bólek, aýdandaǵy «Turan» sharýa qojalyǵy arnaıy balyq ósiretin orynnyń qurylysyn daıyndaý ústinde. Qazirgi tańda onda oryndardy qazý, qural-jabdyqtardy ornatý jumystary júrgizilýde.

Sonymen birge, aýdannan jeke kásipkerlerdiń uıymdastyrýymen pılottyq joba retinde Shardara sý qoımasy aýmaǵynan balyqty torly sharbaqta ósirý sharýashylyǵyn (sadkovoe vyrashıvanıe) qolǵa alý jumystary da júrgizilip jatyr. 2014 jyly osynaý torly sharbaqta synaq retinde 15 tonna balyq ósirilse, byltyrǵy jyly jyl 300 tonna shabaq ósirildi. Sý qoımasyndaǵy torly sharbaqta keleshekte 3000-4000 tonna kóleminde balyq óndirý josparlanyp otyr.

Aıta ketý kerek, búgingi tańda Shardara aýdanynda eki balyq óńdeý zaýyty jumys istep keledi. Sonyń biri – jylyna 2500 tonna balyq óńdeýmen aınalysatyn «Hamıt» STK balyq óńdeý zaýyty. Atalmysh kásiporyn bazasynda fıle, keptirilgen, tuzdalǵan balyqty óńdeý jáne daıyndaý, qaldyqsyz óndiristi qolǵa alý maqsatynda balyq súıeginen untaqtalǵan jem daıyndaý sehtary jumys jasaýda.

Jylyna 1000 tonna muzdatylǵan jáne ystalǵan balyq, fıle ónimderin shyǵaratyn «Shardara – Balyq-1» balyq óńdeý zaýytynda 70 adam jumys jasaıdy.

Munan bólek, jyl sońyna deıin Shardarada taǵy da jańadan eki balyq zaýyty iske qosylmaq. «Údemeli ındýstrıaldy-ınnovasıalyq damý baǵdarlamasy» aıasynda salynyp jatqan jeke kásipker «Jalǵasbaev T» jáne «Saodat» JSHS-i jylyna árqaısysy 600 tonna balyq ónimderin óndirýdi josparlap otyr.