Ońtústik Qazaqstan oblysyndaǵy respýblıkalyq jáne jergilikti jýrnalıser Qazyǵurt aýdanynyń «Amankeldi» jaýapkershiligi shekteýli seriktestigine qarasty júzim alqabymen jáne baý sharýashylyǵymen tanysty.

150 gektar alqapqa ósirilgen júzim jaıqalyp, onyń sabaqtaryna bitken salaly ónim birden kózge túsedi. Júzim terim naýqany da endi bastalǵan eken.

Júzimniń 7-8 sorty bar. Qazirgi tańda Italıadan ákelinip, egilgen júzimniń «Kardınal» sortyn terýde. Júzimniń basqa da «Krasnoe», «Beloe», «Krymskıı shokolad» degen sortymen qosa jergilikti jerge beıim «Taıpa», «Kısh-mısh chernyı», «Damskıı palchık» sorttary da ósirilýde.

Ósirilgen júzimdi aldyn-ala túzilgen kelisim shart boıynsha Reseıdiń Moskva, Habarovsk, Irkýtsk qalalaryndaǵy sýpermarketterge jáne elimizdiń Astana, Almaty, Aqtóbe qalasynyń turǵyndaryna ekologıalyq tabıǵı taza, ári balǵyn jemisterdi jóneltýde.  

«Amangeldi» JSHS-niń ónimderin saqtaýǵa arnalǵan jeke qoımasy bar. Syıymdylyǵy 2 myń tonna bolatyn saqtaý ornyndaǵy 10 kamera tolyqtaı tolǵan ýaqytta ondaǵy ónimder otandyq naryqtan bólek, sheteldik naryqqa shyǵarylady. Búginde 1 myń gektar egistikke bıdaı, maqsary, jemis-jıdek pen júzim ósirip otyr.