Búgin, ıaǵnı 15 kókekti qazaq baspasózi Ǵashyqtar kúni dep nasıqattaǵaly birneshe jyl boldy. Biraq sózden aryǵa barmaı júr. Áý basta "Jas Alashtyń" bastamasymen Valentın kúnine qarsy nasıqat retinde bastalǵan. Sońǵy kezderi "Valentınniń" dámi kete bastasa  da,  bizdiń búgingi Ǵashyqtar meıramymyz toılanbaı tur.  Buǵan birneshe sebep bar:

1. Atalmysh kúndi Qozy-Kórpesh kúni degenmen, ol jyrǵa da Qozy men Baıanǵa da baılanystyratyn dáıek joq. Ánsheıin, Almatydaǵy kóktemniń jaqsy kúnderi bolǵasyn alyna salǵan.

2. Belgilengen merekeniń atrıbýty, belgisi, dástúri joq...

Odan árige barmaı-aq, osy jerden toqtap, myna nárseni qosa ketkendi jón kórdik.

Osydan birneshe jyl buryn Qyz Jibek jyrynyń 500 jyldyǵy atalyp ótti, ol IýNESKO deńgeıinde tirkeldi. Bul jyr qazaqtan basqa túrkilerge tıesili emes, naǵyz qazaqy ǵashyqtyq brendi.  Al, basqa ǵashyqtyq dastandary men tarıhyna ózge túrkilerdiń talasy bar. Ekinshiden, qazaqty álemge alǵash áıgilegen óner de osy "Qyz Jibek" fılmi. Bul - aınymaǵan Romeo-Djýlettanyń dalalyq nusqasy. Qyzyǵy sol, Jibektiń róline qyz tańdaý kastıngi 1970 jyly  19 mamyr kúni (Merýert Ótekeshovanyń áli kúnge deıin esinde, ózim habarlasyp arnaıy anyqtaǵam) ótken. Mine, osy kún - qazaq ǵashyqtyq sezimin áıgileýge, nasıqattaýǵa laıyq kún emes pe?

Ras, Jibek pen Tólegen, Qozy men Baıan sekildi baıansyz mahabbat úlgisi, biraq ony baıandy etip, jalǵastyryp Merýert pen Quman áli tiri júrgen joq pa? Atrıbýt ta, mıf te, dástúr de tunyp tur. Onyń ústine mamyr aıy qazaqty bylaı qoıǵanda, bar halyq úshin mahabbat aıy! Osy kúndi tańdap, bıyldan bastap qolǵa alǵan abzal bolar edi.

Serik Erǵalı