Erasyl Áýbákirovtiń ólimine qatysty sotqa deıingi tyńdaýǵa marqumnyń anasy kire almady. Kenjegúl Áýbákirova Astanaǵa arnaıy kelgenimen, jabyq jaǵdaıda ótken otyrysqa sol kúıde qatystyrylmady. Al, atyshýly qylmystyq iske alqabıler aralasatyn boldy, - dep habarlaıdy Qamshy.kz KTK arnasyna silteme jasap.

-Sotqa alqa bılerdi qatystyrýdy  surap, ótinish jazdyq. Sýdıa ruqst berdi. Meniń qorǵaýymdaǵy Nurbek Ájimbaıdyń ózi jáne onyń ata-anasy da alqa bılerdiń aralasýyn qalap otyr, - deıdi kúdikti Nurbek Ájimbaıdyń advokaty Erlan Ǵazymjanov.

Búkil eldi dúrliktirgen qylmystyq iske qatysty alǵashqy sot otyrysy  2-shi qyrkúıekte ótedi. Esterińizge salsaq, aqpan aıynda Elordadaǵy medısına ýnıversıtetiniń 5-shi kýrs sýtdentin azaptap óltirdi degen kúdikpen tórt adam ustalǵan edi. Basynda «qylmysqa tapsyrys berdi» dep aıyptalǵan Aıan Meıirbaevty polısıeler aqyrynda bosatyp jiberdi.  Erasyl Áýbákirovke jábir kórsetip, uryp, suraý alyp jatqan vıdeosyna qaramastan, ony tergeýshiler kinásiz dep otyr. Kerisinshe, endi Meıirbaev Óskemendegi kásipker ákesimen birge  sotqa jábirlenýshi retinde qatyspaq. Biraq,búgin Meıirbaevtyń ózi sotqa kelmedi. Tek advokaty júr. Qazir  úsh kúdikti – Andreı Tıhonenko, Vıtalıı Sherstenev pen Nurbek Ájimbaı áli abaqtyda otyr. Olarǵa «qylmystyq top qurdy», «seksýaldyq zorlyq-zombylyq kórsetti», «adam óltirdi» degen sıaqty birneshe bap boıynsha aıyp taǵyldy.