Qasıetti Qazyǵurt taýynyń etegindegi baǵbandar da bul baǵytta jemisti eńbek etip keledi. Qazyǵurttyqtar byltyr 1950 gektar jerge baý egip, 28590 tonna ónim jınaǵan. Bıyl alma baýynyń kólemi 300 gektarǵa ulǵaıyp otyr. Sonymen kóp jyldyq ekpeler 2250 gektarǵa jetti. Qazyǵurt aýdanyndaǵy «Amangeldi» JSHS 530 gektar jerge baý, 120 gektar jerge júzim ekti. Seriktestik 276,2 mıllıon teńgege syıymdylyǵy 2 myń tonnalyq jemis-jıdek jáne kókónis qoımasyn iske qosty.
Ońtústik Qazaqstan oblysyna qarasty Qazyǵurt aýdanynyń baǵbandarynyń kóp jyldyń eńbekteri 2250 gektarǵa jetkenimen, baǵbandar jumystyń sanyna emes, sapasyna kóńil bóletinderin aıtty. Aıtýlarynsha, dárilengen ónimderden taza baǵbandyq ónim otandy ónimniń sapasyn arttyryp, el ekonomıkasyna úles qosýdyń birden bir joly deıdi baǵbandar.
Aýdan kólemindegi agroqurylymdardy sapaly jemis-jıdek ekpeleriniń kópjyldyq kóshetterimen qamtamasyz etý maqsatynda «Amangeldi» JSHS «tuqymbaq» mártebesin alǵan edi. Bıyl 1,4 mıllıon kóshet óndirip, oblystaǵy barlyq sharýashylyqtarǵa satqan.
Seriktestik 2017 jyly 1,8 mıllıon túp kóshet daıyndaýdy josparlap otyr. Atalǵan tuqymbaqta «Golden delıshes», «Renet semırenko», «Starkrımson» sortty almalary, «Ispolınskaıa» sortty alqory, «Chempıon», «Elberta» sortty shabdaly, «Taıfı rozovyı», «Kısh-mısh chernyı» sortty júzim kóshetteri ósiriledi. Qazyǵurt aýdandyq aýyl sharýashylyǵy jáne jer qatynastary bóliminiń bas mamany Marat Joldasovtyń aıtýynsha, byltyr seriktestikke memleket tarapynan ósirgen kóshetter úshin 45 mıllıon teńge sýbsıdıa tólengen.
