Ońtústik Qazaqstanda astyq orý naýqany bastaldy. Oblysymyzda bıyl astyq orý jumystary ótken jylmen salystyrǵanda 10-15 kúnge erte qolǵa alynyp otyr. Jalpy aımaqta 195 myń gektarǵa masaqty daqyldar egilgen bolsa, onyń 156,7 myń gektary bıdaı, al 38,3 myń gektary arpa.

Eginge alǵashqy oraqty qazyǵurttyq sharýalar saldy. Atalǵan aýdanda 34 myń gektarǵa jýyq jerge bıdaı egilse, 3,2 myń gektaryna arpa egilgen.

Búginde alǵashqy oraqty «Amankeldi» JSHS bıdaı jáne arpa orý jumystaryn 1,5 myń ga jerde júrgizýde. Memleket tarapynan der kezinde berilgen qoldaýlardyń arqasynda ótken jylmen salystyrǵanda munda daqyldardyń ortasha túsimi 20% joǵary. Qojalyq basshysy N.Quralovtyń aıtýynsha, astyqty jınap alý jumystaryna 15 kombaın men 12 KAMAZ júk kóligi jumyldyrylǵan. Al daıyn 30 myń tonna bıdaıdy Aýǵanstan, Iran jáne Ózbekstan memleketterine eksporttaýǵa kelisimder jasalyp qoıylǵan.

Aıta keteıik, taýar óndirýshilerge jeńildetilgen baǵamen beriletin mıneraldy tyńaıtqyshtyń kólemi ótken jylmen salystyrǵanda 4 myń tonnaǵa artyp, 80 myń tonnany qurady.
Kóktemgi dala jumystaryna bólingen 38 myń tonna janar-jaǵar maıdyń 37,2 myń tonnasy bosatyldy.

Masaqty daqyldardyń aldyn-ala jasalynǵan boljamdyq esebi boıynsha 195 myń ga alqaptyń ár gektarynan 22 sentnerden jalpy 430 myń tonnadan asa ónim alynady dep kútilýde.
Jalpy alǵanda osy jyly aýyl sharýashylyǵy daqyldarynyń egis kólemi ótken jylmen salystyrǵanda 4 myń ga artyp, 780 myń ga quraıdy.