Qazaqstanda kelesi úsh jylda aýyl sharýashylyǵy kooperatıvteri negizinde shamamen 400 sút jınaý pýnktteri qurylatyn bolady. Bul sút baǵasyn kem degende 20 paıyzǵa tómendetedi. Bul týraly QR ASHM Mal sharýashylyǵy ónimderin óndirý jáne qaıta óńdeý departamentiniń dırektory Erkebulan Ahmetov málim etti.

– Qazirgi ýaqytta sút zaýyttarynyń barlyǵy tolyq qýattaryn paıdalana almaı otyr, sonyń kesirinen olarda amortızasıalyq shyǵynnyń úlesi basym, ol óz kezeginde súttiń ózindik qunyna áser etedi. Sondyqtan biz olardyń qýatyn qamtamasyz etetin bolsaq, biz súttiń baǵasyn 20 paıyzǵa deıin tómendete alamyz, – dedi ol. 
Onyń sózine qaraǵanda, búginde et pen súttiń 70-80%-y jeke sharýashylyqtarmen shyǵarylady. Al óńdeýshi kásiporyndar tek 60%-ǵa ǵana shıkizat ónimdermen qamtamasyz etilgen.
– Sútti jınaý jáne ony sút zaýyttaryna jetkizý ınfraqurylymy bizde kemshin. Sondyqtan biz sútti jınaý jáne ony óńdeýshi kásiporyndarǵa jetkizý úshin jaǵdaılar jasaımyz, – dedi departament basshysy.
Aıta ketsek, osy maqsatta «Jumyspen qamtý-2020» baǵdarlamasy aıasynda shaǵyn nesıeler berilmek. Atalmysh nesıeler 3-7 jylǵa 3-7 mln teńge kóleminde 6% ústememen mal sharýashylyǵyna, sút jınaý pýnktterin qurýǵa bólinedi.