Adamzat balasy búginde balamaly energıa kózderin damytýǵa bet burdy: jel, kún energıasyn kádege jarata alsańyz, onyń paıdasy kóp-aq. Álem elderi burynnan-aq mundaı energıanyń paıdasyn kórip keledi. Jańa ǵasyrdaǵy jańa ıgilikterdi paıdalanýda bizde de betburys bar. Jer-jerde kún, jel energıasyn óndiretin stansalar salynyp jatqany málim. Búginde Shymkenttiń Ortalyq kósheleriniń boıyna kún sáýlesinen qýat alatyn qondyrǵylar ornatyla bastady. Ásirese, jaıaý júrginshiler ótkelderin jańǵyrtýda mundaı jobanyń paıdasy kóp bolyp tur.El Úkimeti «Jasyl ekonomıkaǵa» kóshýdiń tetikterin qarastyryp jatqany da ras. Kelesi jyly ótetin «Ekspo 2017» halyqaralyq kórmesi de osy taqyrypty arqaý etip otyr.

Jýyrda Sozaq aýdanynda kún sáýlesinen elektr energıasyn óndiretin stansıa salynatyny málim boldy. Jobany iske asyrýǵa germanıalyq «Green Energy 3000 Holding» kompanıasy nıet tanytqan. Aýdan ákimdiginiń baspasóz qyzmeti habarlaǵandaı, stansıanyń qurylys jumystary osy jyldyń qarasha aıynda bastalady. Keler jyly tolyq qýatymen júzege asatyn jobada 50 adam jumyspen qamtylmaq. Jospar – 50 MVt elektr energıasyn óndirý, al jobanyń tutynýshysy «KEGOC» AQ bolmaq. 
Jańa ınovasıanyń ıgiligi kóp. Ásirese, bul tehnologıany jyl boıy kúnniń kózi ysyp turatyn Ońtústikte damytý qolaıly. Búginde qaladaǵy jaıaý júrginshiler ótkeli boıynda kún batareıalary ornatylǵanyn baıqap júrmiz. Iaǵnı, qaýipsizdikti saqtaý maqsatynda qoıylǵan jol belgilerin osy kún batareıalary qýattandyrady.