Oblys aýmaǵynda Jer Kodeksin talqylaý jáne túsindirý jumystary júrgizilýde. Osy maqsatta Aqsýkent eldimekeninde Memleket basshysynyń arnaıy tapsyrmasymen qurylǵan Respýblıkalyq komısıanyń múshesi,  «Qazaq maqta qaýymdastyǵy» zańdy tulǵalar birlestiginiń tóraǵasy Saın Baqtybaev Ońtústik turǵyndarymen kezdesti. Respýblıkalyq komısıanyń búginge deıingi atqarylǵan jumystary jaıly baıandama jasady.aýdandyq qoǵamdyq kelisim keńesiniń tóraǵasy Amangeldi Qabylbekovtyń jetekshiligimen ótken májiliske oblystyq ishki saıasat basqarmasynyń basshysy Bolatbek Tólegen, oblystyq ardagerler uıymynyń tóraǵasy Jeńisbek Máýlenqulov, oblystyq jer qatynastary basqarmasynyń basshysy Sozaqbaı Ábdiqulov jáne oblystyq Qoǵamdyq keńes janynan qurylǵan jumysshy top músheleri qatysty. Sondaı-aq, Shymkent qalasy, Saıram, Ordabasy, Túlkibas, Tólebı aýdandaryna qarasty sharýa qojalyqtarynyń tóraǵalary da óz oıyn bildirip, usynystaryn ortaǵa saldy.

– Jerdi satpaımyz, jalǵa da bermeımiz!» dep shyr-pyr bolǵan eldiki de jón. Árkim óz oıyn, elge, jerge degen sezimin árqalaı bildiredi. Áıtkenmen, «Jer Kodeksiniń maqsaty ne?» biz aldymen osyny aıqyndap alýymyz kerek. Jer ıgerilmese, jaramsyzdyǵy arta beredi. Al bir ǵana mılımetr jerdiń ózi sory shyqsa, memleketke qyrýar shyǵyn keltiredi. Jerdi «tozdyrmaý» úshin ony qalaı bolmasyn paıdalaný qajet, tyńaıtyp otyrý kerek, – degen J.Máýlenqulov jastarǵa qullaqqaǵys jasady. – Máselen, Soltústik Qazaqstan oblysynda halyq sany az, jeri keń. Sol jerlerdi paıdalaný úshin Ońtústik óńiriniń halqy tyǵyz ornalasqan aımaqtarynan jas otbasylar shaqyrylyp jatyr. Halyq jerge, elge degen otansúıgishtigin bir qadam jerin tyńaıtý arqyly da kórsete alady. Jer sharýashylyǵynan qashpaý kerek. «Qybyrlaǵan qyr asady» degen sóz bar. Jastar «aýyr jumys» dep qınalmasa, birtalaı bos jatqan jer ıgeriler edi. Bul elge de, ózderine de tek paıda keltiredi. 

Respýblıkalyq komısıa Jer kodeksindegi ózekti máselelerdi aıqyndap, qoǵamdyq talqylaýdan qorytyndy jasap, usynystardy Parlamentke tapsyratyn bolady. Al el ishinde Jer Kodeksine baılanysty naqty usynysy bar azamattar jyl sońyna deıin oıyn tıisti oryndarǵa jetkizýge múmkindigi bar.