Mońǵolıa Respýblıkasy, Baıan-Ólgeı aımaǵynda oryn alǵan seldiń zardabynan 700-ge jýyq qandasymyz zardap shegip, kóbi baspanasyz qalǵan edi. Tótenshe jaǵdaıǵa kómek qolyn sozýǵa eń alǵashqylardyń biri bolyp Ońtústik Qazaqstan oblysy ákiminiń qoldaýymen belsendi jastar atsalysty.

Oblys ákimdiginiń qyzmetkerleri bir kúndik jalaqylaryn aýdarsa, kásipkerlerdiń demeýshiligimen 7 tonnaǵa jýyq un, 1 tonna makaron, 1000 banka tuzdalǵan qıar jáne kondıterlik ónimder, irimshik, shujyq, taýyq eti, basqa da azyq-túlik pen 5000 dana shulyq jóneltildi. Sondaı-aq, zardap shekken 5 otbasynyń úı salýǵa jumsaıtyn qurylys materıaldaryn oblys turǵyndarynan jınalǵan 3 mln teńge kólemindegi qarajatpen qamtamasyz etetin boldy.

– Baıan-Ólgeıdegi qandastarymyzǵa kómek kórsetýde kólik máselesin sheship, kedendik qujattardy rásimdeýge jáne basqa da uıymdastyrýshylyq jumystarǵa oblys ákimi B.Atamqulov qoldaý kórsetti. Mońǵolıadaǵy jaǵdaıdy kózben kórip, qandastarymyzǵa gýmanıtarlyq kómekti jetkizilgenine ózim kýá bolyp qaıtamyn, – deıdi «Bizben birge» qoǵamdyq qorynyń tóraǵasy A.Ańdabaev.