Shymkentte «ádemi aýlada ómir súremin» degen turǵyndardyń qolyn eshkim qaqpaıdy. Aınalańyzdy kórkem etkińiz kelse, iske sát!

Ál-Farabı aýdanyna qarasty N.Rashıdov kóshesindegi №25 úıdiń turǵyndary óz aýlalarynyń ásemdigine basty nazar aýdarǵan. Úsh jyldan beri olar japyraǵy jaıqalǵan aǵashy, túrli tústi kózdiń jaýyn alatyn gúlderi bar aýlada ómir súrýde. Tek eresekterge ǵana emes, sonymen birge jas balaqaılar úshin de oıyn alańshasyn bezendirgen. Bári de rıza. Ásirese, jazdyń aptap ystyǵynda ádemi kórinistiń ortasynda tynyqqanǵa ne jetsin. Qarap otyrsańyz, janyńyz rahat tabady. Quddy bir ertegiler álemine saıahattap kelgendeı áserde bolasyz. Besqabatty úıdiń barlyq kire berisinde gúl egilgen, aǵashtar men jasyl shyrshalar otyrǵyzylǵan. Bári de ózderine tán shaǵyn ǵana landshaftymen jáne jınaqylyǵymen erekshe kóz tartady. Osy keremet ıgi iske bastamashy bolǵan Natalá Frolova eken. Sulýlyqqa jany qushtar zeınetker kúni boıy aýlalardaǵy aǵashtar men gúlderdi sýaryp, tazalyq jumystaryn júrgizedi. Biz barǵanda da Natalá Anatolevna aýlasyndaǵy baqshasyna qarap júr eken. 

 – Bul bastama zeınetke shyqqan soń júzege asa bastady. Kúni boıy úıdemin. Odan birtindep aýlamyzdy kóriktendire bastadym. Aýlamyz jaıqala bastaǵan soń, kórshilerim de qol ushyn berdi. Biraq bar materıaldyq shyǵyndy óz qaltamnan shyǵardym. Bastapqyda ońaı boldy dep aıta almaımyn. Shelektep topyraq pen tas tasydym. Kóshet qondyrdym, gúl otyrǵyzdym. Ótken jyly «Úzdik aýla» saıysyna qatysyp, ekinshi oryndy ıelendik. Bıyl taǵy da qatysamyz dep ótinish berdik. Soǵan qyzý daıyndyq júrip jatyr. Áıteýir, kún saıyn kem-ketikti rettep júrmin. Aýlamyz byltyrǵydan da kóriktene túsken, – deıdi N.Frolova. 
Kópqabatty úı turǵyndarynyń aıtýynsha, qazir jaıqalyp turǵan aýlalarda kólik tizilip turýshy edi. Oǵan qosa, balalar oınaıtyn alańsha da suryqsyz bolatyn. Aýlalardy kógaldandyryp bolǵan soń, oıyn alańshalaryna da kiriskenin jetkizdi. «İsten shyqqan kólik dońǵalaqtaryn túrli túske boıap, alańshany qorshadyq, – deıdi osy úıdiń turǵyny Klara Meńdiǵulova. 

– Sosyn sol dońǵalaqtardan túrli aqqýdyń músinderin jasap, olardy aq túske boıadyq. Balaqaılardyń oınaýyna yńǵaıly bolý úshin barymyzdy saldyq. Osynda onǵa jýyq zeınetker turamyz. Ermegimiz – osy aýlamyz. Bizdiń bastamamyzǵa kórshi úıdiń turǵyndary da qyzyǵyp, olar da aýlalaryn kóriktendire bastady».

Rashıdov kóshesi, №25 úıdiń turǵyndary bıyl ótetin «Úzdik aýla» saıysynda birinshi oryn alsaq» dep otyr. Ál-Farabı aýdanynda osy úı sekildi «synnan súrinbeı ótsek» degender kóp. Aıta keter bolsaq, bıyl «Úzdik aýla» jáne «Úzdik kóshe» nomınasıasynan 28 kóshe men 61 aýla turǵyndary úmitti. Al ótken jyly «Taza qala» aksıasyna aýdannan jalpy 82 ótinish berilipti.