BUU-nyń Adam quqyqtary jónindegi Joǵarǵy komısary Zeıd Raad al-Hýseın Iemendegi oqıǵalardy zertteý úshin halyqaralyq táýelsiz uıym qurýǵa shaqyrdy, - dep habarlaıdy Qamshy.kz.
Joǵarǵy komısardyń sózine sensek, bul eldegi adam quqyqtary men halyqaralyq gýmanıtarlyq quqyqtyń buzylǵany sonshalyq, bul salada zertteý júrgizetin Ulttyq komısıa zor qıyndyqtarǵa tap bolýda.
Beısenbi kúni BUU-nyń Adam quqyqtary jónindegi Keńesi Iemendegi jaǵdaıǵa baılanysty baıandama jasady. «2015 jyldyń naýryzynan 2016 jyldyń 23 tamyzyna deıin Iemendegi soǵys 3799 azamattyq tulǵanyń ómirin qıyp, 6711 beıbit turǵyn jaralanǵan» dep jazylǵan baıandamada. Bul elde az degende 7,6 mıllıon adam, onyń ishinde 3 mıllıon ana men bala azyq-túlik tapshylyǵyn tartýda. Taǵy 3 mıllıon adam úıin tastap ketýge májbúr bolǵan.
BUU-nyń arnaıy baıandamasy «Iemen turǵyndarynyń taýqymetine shek qoıý — halyqaralyq qoǵamdastyqtyń paryzy» dep túıindelgen.
