Qazaqstan Respýblıkasy Ulttyq ulany «Ońtústik» óńirlik qolbasshylyǵyna qarasty Almaty qalasyndaǵy 5571 áskerı bóliminiń bazasynda tamyzdyń 25-27 kúnderi aralyǵynda óńirlik qolbasshylyq áskerı bólimderiniń tárbıe jáne áleýmettik-quqyqtyq jumystar bólimsheleriniń (toptarynyń) bastyqtarymen jáne júıeles batalón komandırleriniń, sonymen qatar arnaıy komendatýralar komendanttarynyń tárbıe jáne áleýmettik-quqyqtyq jumystar jónindegi orynbasarlarymen oqý-ádistemelik jıyn ótti, - dep habarlaıdy Qamshy.kz óńirlik qolbasshylyq baspasóz qyzmetiniń ókili Aıdos Baıshaǵyrovqa silteme jasap.
Jıynǵa qatysýshy Ulttyq ulannyń tárbıeshi ofıserleri sharanyń alǵashqy kúnin basshylyq qujattardy bilý boıynsha synaq tapsyrýdan bastady. Synaqtama qabyldanǵannan keıin oqý-ádistemelik jıyn jetekshisi Ulttyq ulannyń «Ońtústik» óńirlik qolbasshylyǵy qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Sabyrjan Súleımenov elimizdegi qazirgi qoǵamdyq-saıası ahýaldy zerdeleı kele, 2016 jylǵy 1 jartyjyldyqtaǵy tárbıe, zańdylyq, quqyqtyq tártip, qoǵamdyq qaýipsizdik boıynsha óńirlik qolbasshylyqtaǵy atqarylǵan barsha is-sharalardy saralap qorytyndylady, sondaı-aq aldaǵy kele jatqan Qazaqstan Respýblıkasy Táýelsizdiginiń 25 jyldyǵynyń ózektiligine de toqtalyp ótti.
Osylaı bastaý alǵan jıyn barysy «Konstıtýsıa – turaqtylyq kepili jáne elimizdiń qaýipsizdik qalqany» atty taqyryptaǵy dóńgelek ústelge ulasty. Atalǵan dóńgelek ústel Qazaqstan Respýblıkasy Táýelsizdiginiń 25 jyldyq merziminde el tynysynyń baǵdarshysy, azamattardyń quqyqtary men bostandyqtaryna kepildik beretin memleketimizdegi negizgi zań – Konstıtýsıaǵa arnaldy. Atalǵan sharaǵa Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satov, Qazaqstan halqy Assembleıasynyń múshesi, qoǵam qaıratkeri, «Dostyq» ordeniniń ıegeri Asyly Osman, Qazaqstan halqy Assembleıasynyń múshesi, fılosofıa ǵylymdarynyń doktory, «Qurmet» ordeniniń ıegeri Qazaqbaı Qasymov, «KTK» telearnasynyń shef-redaktory, «Chernyı kvadrat» avtorlyq baǵdarlamasynyń jetekshisi jáne júrgizýshisi Valerıı Tarakanov, «Nur Otan» partıasy saıası keńesiniń múshesi Ádil Nesipbaev, Almaty qalalyq İshki ister departamenti Ardagerler keńesi prezıdıýmynyń tóraǵasy general-maıor Saǵynjan Asyl-Keneı, «Generaldar keńesi» respýblıkalyq qoǵamdyq birlestiginiń múshesi general-maıor Ivan Komarov, Qazaq memlekettik qyzdar ýnıversıtetiniń magıstranty Dáýlet Rysqalıev, sonymen qatar qoǵamdyq jáne ózara is-qımyl birlestiktegi organdardyń ókilderi, Ulttyq ulan ardagerleri, ınternasıonalıs jaýyngerler, jıyn qatysýshylary men BAQ ókilderi qatysty.
Dóńgelek ústel barysynda quqyqtyq tártip áskeriniń el táýelsizdigimen birge jasasqan 25 jyldaǵy jetken jetistikteri men quqyqtyq tárbıe salasyndaǵy birqatar máseleler ortaǵa salyndy. Sonymen qatar óskeleń urpaqty jáne áskerı qyzmetshilerdi jańa qazaqstandyq patrıotızm áleýetinde tárbıeleý boıynsha tárbıeshi ofıserlerdiń kásibı daıarlyq deńgeılerin joǵarylatý jáne áskerdegi ıdeologıalyq jumystardyń durys júrgizilýin uıymdastyrý sekildi máseleler de kóterildi.
Shara barysynda Ulttyq ulannyń bas tárbıeshisi Muhametqalı Satov Elbasy Nursultan Nazarbaevtyń bastamasymen elimizde memleket kóleminde atalyp ótkeli otyrǵan Qazaqstan Táýelsizdiginiń 25 jyldyq mereıtoıynyń ıdeologıalyq mańyzyna erekshe toqtaldy. Ol óz sózinde:
"Tarıhyn tereńnen tartqan halqymyz talaı-talaı tar jol, taıǵaq keshýlerden ótken. Nebir jaýgershilik zamandardy bastan keshtik, ashtyq zobalańyn kórip, saıası qýǵyn-súrgin zardabyn da tarttyq. Sondaı el basyna qara bult úıirilgen, qıyn-qystaý shaqtarda qazaqty bir uly kúsh aman saqtap qaldy. Ol – birlik kúshi edi. Qandaı qıyndyq bolmasyn biz el birligi arqyly jeńip kelemiz. Elbasymyzdyń salıqaly saıasatynyń arqasynda qabyldanǵanyna 21 jyl tolǵan Ata zańymyz – Konstıtýsıa negizinde Otanymyzdyń mártebesi, jurtymyzdyń ál-áýqaty artyp, memleketimiz qaryshty qadammen damyp keledi. Bul turǵyda Ata zańymyz óziniń tıimdiligin, ýaqyt pen el qajettiliginen týǵan qujat ekendigin aıqyn dáleldep otyr. Qazirgi tańda Qazaqstan tek TMD elderi ishinde ǵana emes, tutastaı Ortalyq Azıa aımaǵyndaǵy kóshbasshy elge aınaldy. Búgingi turaqty ekonomıkalyq damýymyz, halyqtyń áleýmettik jaǵdaıynyń artýy, memlekettik organdardyń tıimdi jumysy, saıası turaqtylyq, eń bastysy – halyqtyń birligi men tatýlyǵy, etnosaralyq, dinaralyq daý-janjaldardyń bizdiń qoǵam úshin jat qubylys sanalýy – Ata zańymyzdyń arqasy. Bıylǵy jyly Qazaqstan Táýelsizdiginiń 25 jyldyq mańyzy zor mereıtoıyn atap ótýimizdegi basty maqsat aq bilektiń kúshimen, aq naızanyń ushymen, bozdaqtardyń qanymen kelgen baǵasy zor qundylyǵymyz - eldigimizdiń egemendigin álemge pash etý. Endigi bizdiń mısıamyz elimizdiń jastary men óskeleń urpaqty patrıottyq rýhta tárbıelep, Uly dala eli batyrlary – babalarymyz bizge amanattap ketken Táýelsizdik týyn tuǵyrymyzda máńgi aspandatyp, memleketimizdiń tynyshtyǵy men qaýipsizdigi jolynda qashanda qorǵanys qalqany bolý!", - dep atap ótti.
Dóńgelek ústelde sóz alyp baıandama jasaǵan Qazaqstan halqy Assembleıasynyń múshesi, Qazaqbaı Qasymov ta Qazaqstan Táýelsizdiginiń bul mereıtoıyn atap ótý ár qazaqtyń keýdesinde maqtanysh sezimin týǵyzatyn memlekettik mańyzdy shara ekenin basa aıtyp, áskerı qyzmetshiler men Qazaqstan Respýblıkasynyń barsha azamattaryn elimizdiń memlekettik rámizderi men týyn, eltańbasyn, sonymen qatar týǵan tilin qurmetteýge shaqyrdy.
Shara barysynda sóz alǵan baıandamashylardyń barlyǵy da elimizdiń tarıhyndaǵy eleýli kezeń Qazaqstan táýelsizdigi meretoıynyń tárbıelik mańyzyn basa aıtyp, osy bir eleýli sharadan tys qalmaǵan Ulttyq ulan Bas qolbasshylyǵyna alǵystaryn jetkizdi.
Biliktilikti arttyrýǵa baǵyttalǵan shara baǵdarlamasy boıynsha úsh kúnge sozylǵan oqý-ádistemelik jıynnyń qatysýshylaryna barlyǵy jıyrmadan astam sabaqtar ótkizildi. Tárbıe prosesindegi basshylyq qujattar talaptaryn meńgerý deńgeıin anyqtaýǵa arnalǵan synaqtar alynyp, dene daıarlyǵy boıynsha normatıvter qabyldandy.
Jıynnyń ekinshi kúni Ulttyq ulan Bas tárbıeshisi Muhametqalı Qusaıynuly jıyn qatysýshylarymen eldegi jáne álemdegi áleýmettik-ekonomıkalyq ahýal týraly aqparattandyrý dárisin ótkizdi.
Úsh kúnge sozylǵan oqý-ádistemelik jıyn sapalyq turǵydan mazmundy sharalarǵa toly boldy. Árbir jıyn qatysýshysy kúndelikti tárbıe jumysyn uıymdastyrýda qajet mańyzdy tyń maǵlumattarǵa qanyǵyp, kásibı turǵyda tanymyn keńeıtkeni sózsiz. Endi olar oqý-ádistemelik jıyn barysynda kórgeni men túıgenin jeke qurammen tárbıe jumysy kezinde utymdy qoldanatyn bolady.
