Búgin Astanadaǵy №2 Esil aýdandyq sotynda Qazaqstan jýrnalıser odaǵynyń tóraǵasy Seıitqazy Mataev pen onyń uly, «QazTAG» aqparattyq agenttiginiń bas dırektory Áset Mataevtardyń qylmystyq isi boıynsha sottyń isti qaraýy jalǵasty. Aıyptalýshylarǵa «alaıaqtyq jasady jáne salyqtan jaltardy» degen aıyptar taǵylyp otyr. «Qazaqtelekom» AQ-na qatysty birinshi epızod boıynsha sotqa jaýap bergen «Qazaqtelekom» AQ-nyń basqarma múshesi, strategıalyq basqarý jónindegi bas dırektory Batyr Mahanbetajıev S. Mataevtyń jýrnalıser arasynda bedeldi jáne yqpaldy adam bolǵandyqtan onyń adaldyǵyna senip qalǵanyn málimdedi.
B. Mahanbetajıev sotqa deıingi tergeýge bergen túsiniginde 2011 jylǵa deıin S. Mataevpen tanys bolmaǵanyn, biraq bir-birin syrttaı bilgenin aıtypty. 2011 jyldyń basynda S. Mataev oǵan habarlasyp, ózi basshylyq etetin «Ulttyq baspasóz klýby» qoǵamdyq birlestigine tenderde túzý nıetpen qaraýǵa ótinish jasaıdy. «Áńgime barysynda ol 2007 jyldan beri «Qazaqtelekomnyń» qyzmeti týraly materıaldardy BAQ-da jarıalap kele jatqanyn, sol ýaqyttan beri eshqandaı da másele týyndamaǵanyn aıtty. Men buǵan deıin S. Mataevty syrttaı tanıtynmyn. Joǵary laýazymdy qyzmetterdi atqarǵanyn, onyń jýrnalıser arasynda asa bedeldi jáne yqpaldy adam ekenin de biletinmin. Sol sebepten ótinishine qulaq astym. S. Mataevqa tender kezinde jan-jaqty kómek kórsetýge, atqarylǵan jumystar týraly aktige qol qoıýǵa, der kezinde aqsha tóleýge jáne basqa máselelerdi sheshýge ýáde berdim» dedi ol sotqa bergen túsiniginde.
Keıinirek, «Qazaqtelekom» AQ-nyń buqaramen baılanys jónindegi qyzmetiniń jetekshisi Iýlıa Isakovaǵa tender ótkizý kezinde kez-kelgen ádispen «Ulttyq baspasóz klýbynyń» jeńisin qamtamasyz etýge kómektesýdi tapsyrady. 2011 jyldyń kókteminde «Qazaqtelekom» AQ-y jarnamalyq-aqparattyq materıaldardy ornalastyrý boıynsha qyzmet túrlerin satyp alýǵa tender ótkizedi. Alaıda tender ótkizilmegen bolyp esepteledi. Sodan keıin kompanıa «bir kózden» qarjylandyrý úshin «Ulttyq baspasóz klýby» qoǵamdyq birlestigimen kelisim-shart jasaýǵa sheshim qabyldaıdy. Kelisim-sharttardy ázirleý kezinde (sonyń ishinde qyzmet túrleriniń quny da bar) ol Iý. Isakovaǵa baspa BAQ-tardyń praıs-paraqshasynda bekitilgen baǵany emes, «Ulttyq baspasóz klýby» QB-niń konkýrstyq ótiniminiń baǵasyn engizýdi tapsyrady. Iý. Isakova óz kezeginde kelisim-shartty solaı daıyndaýǵa menedjerlerge tapsyrma beredi.
Strategıalyq basqarý jónindegi bas dırektordyń pármenimen, Iý. Isakovanyń jetekshiligimen menedjerler «Ulttyq baspasóz klýbyna» jan-jaqty «járdem» beredi. Máselen, olar «Ulttyq baspasóz klýby» konkýrstyq ótinimin resmı túrde tapsyrǵanǵa deıin, aldyn-ala qarap, kemshiligi bolǵan jaǵdaıda ony qalaı túzetý joldaryn nusqap otyrǵan. Al B. Mahanbetajıev atqarylǵan jumystardy teksermeı, «Ulttyq baspasóz klýby» QB-niń aktileri men esep-qısap qujattaryna is júzinde eshqandaı tekseris júrgizbeı, qol qoıa bergen. Óziniń aıtýynsha, jýrnalıserdiń arasynda asa tanymal jáne yqpaldy adam bolǵandyqtan S. Mataevtyń adaldyǵyna sengen. Aıtarlyǵy, «Qazaqtelekom» AQ-y men «Ulttyq baspasóz klýbynyń» arasynda joǵarydaǵydaı kelisim-sharttardy jasaý 2012 jáne 2013 jyldary da júzege asyrylǵan. Onda da tenderlik rásimder «jasandy» jolmen ótkizilip, sońynan «Ulttyq baspasóz klýbyna» «bir kózden» qarajat aýdarylyp otyrǵan. B. Mahanbetajıev pen Iý. Isakovalar atqarylǵan jumystardyń shynaıylyǵyn teksermeı, aktiler men esep-qısap qujattaryna qol qoıǵan. Sodan keıin qomaqty qarajat «Ulttyq baspasóz klýbynyń» esep-shotyna aýdyrylyp otyrǵan. Aıta ketelik, Seıitqazy jáne Áset Mataevtar «Qazaqtelekom» AQ-nyń 143 mln. teńgege jýyq aqshasyn urlaǵan.
Ámirlan Álimjan
