Baıan Esentaevany uryp-soǵý isi prokýratýraǵa berildi. Bul týraly Almaty oblystyq İİD-niń resmı saýalǵa berilgen jaýabynda aıtylady, - dep habarlaıdy Qamshy.kz Tengrinews.kz - ke silteme jasap.
"Adam óltirýge oqtaldy degen kúdikke ilingen Baqytbek Esentaev qamaýda otyr. Qylmystyq istiń materıaldary zertteý úshin jáne keıin sotqa jiberilýi úshin Almaty oblysynyń prokýratýrasyna joldandy", - delingen jaýapta. Sonymen qatar, İİD ókilderi Esentaevany sýretke túsirip, áleýmettik jelilerde taratý deregi boıynsha tergeýdiń jalǵasyp jatqanyn habarlady. "Osy derek boıynsha jazany sot anyqtaıdy", - dedi polısıadaǵylar.
Eske salaıyq, Baıan Esentaeva 10 maýsymda aýyr jaǵdaıda Talǵardaǵy aýrýhanaǵa túsken bolatyn. Tergeýdiń málimetinshe, ony kúıeýi Baqytbek Esentaev aıaýsyz uryp soǵyp, birneshe ret pyshaqtaǵan. Bul oqıǵa Eńbekshi aýylynyń mańynda Qulja tas jolynda bolǵan.
Er adam ustalyp, Talǵar aýdandyq ishki ister basqarmasyna jetkizildi. Keıin İİB ókilderi medısınalyq kýálandyrý qorytyndysy boıynsha Baqytbek Esentaevtyń mas bolǵanyn aıtty. Ol óz kinásin moıyndap otyr eken. İs "Adam óltirýge oqtalý" baby boıynsha tergelip jatyr. Esentaeva aýrýhanada 10 kún boldy, biraq úıine shyqqannan keıin de ambýlator tártibinde em aldy.
