Ońtústik Qazaqstan oblysy Tóle bı aýdanynda ótken toılardyń birinde osyndaı keleńsiz jaǵdaı oryn alǵan,  - dep habarlaıdy Qamshy.kz «Zamana» gazetine silteme jasap.

Toı qanshalyqty kóp ótken saıyn ol týraly sóz de sonshalyqty mol bolatyn sekildi. Ońtústik Qazaqstan oblysy, Tóle bı aýdanynyń turǵyny Tórebek Nıazov ótken aptada toıda kórgen qyzyqtary týraly bylaısha baıandady:

- Senbi kúni baldyzymyzdyń uzatý toıyna bardyq. Toı qyzyqty ótti. Oıyn-kúlki, ázil-ospaq, jaqsy án men bı – bári boldy. Qudalardy kútý jaǵyna «bes» degennen basqa baǵa da qoıa almaımyz. Bastalarda toıdyń ishimdiksiz ótetinin bildik. Bul kúıeý balanyń qalaýy eken. Alǵashynda kúıeý bala namazǵa jyǵylǵandyqtan halal toı jasaǵysy kelgen bolar dep oılaǵanbyz. Sóıtsek, ol namaz da oqymaıdy eken.
Jasyratyny joq, bárimizdiń ishkimiz kelip tur. Aramyzda osy toıda jaqsylap demalamyn dep barǵandar joq emes edi. Araq bolmaǵan soń tamaq ta durys jelinbegendeı boldy. Árkim shuqyp-shuqyp qoıyp qarap otyr. Toı ıeleri osyny túsinse kerek, bir ýaqytta bizder jaqqa keletin shaı kóbeıdi. Barlyǵynyń aldyna «Lıpton» qurǵaq shaıy salynǵan sháınekter kele bastady. Quda bala aınalyp árkimniń qulaǵyna sybyrlap júrgeniniń syryn keıin bildik. Sóıtsek sháınektermen kelip jatqan shaı emes, araq eken. Basqalardyń nazaryn aýdarmas úshin qurǵaq shaı salyp qoıypty. Sol sol eken, qyza bastadyq. Tamaqtar da jelindi, bizdiń jaqtan bı de bılendi.

İship otyrǵanymyzdyń túsi ózgerdi demeseń araqtan esh aıyrmasy joq. Shaıdyń da dámi shyqpaǵan. Osylaı toıdan qyzara bórtip qaıttyq. Qoshtasarda qý tildi qudalardyń biri: «Ol zaman da, bul zaman, shaıǵa mas bolǵan qonaqtardy birinshi ret kórdim», – dep qaǵytyp jatty. Osylaısha biz baldyzymyzdyń toıynda shaı qosylǵan araq iship qaıttyq. Bul qyzyq emes pe? - deıdi Tórebek Nıazov.