Mamandar 1200 oryndyq 10 mektepti alyp, árbir aımaqta jobasy birdeı mektep qurylysyna ketetin shyǵyndy salystyryp kórdi. Sonda ol shyǵyndarynyń aıyrmashylyǵy 900 mln.teńgeden 2 mlrd. teńgege deıin jetken. Mektepterdi salǵan on merdigerdiń ishinde 8 qurylys kompanıasynda salyqtan jaltarý sxemalary baıqaldy. Osyndaı sxemalardyń saldarynan el búdjetine 1 trln. teńgeniń salyǵy tólenbeı qalǵan, dep xabarlaıdy Qamshy.kz Baq.kz - ke silteme jasap.
Búginde memlekettik baǵdarlamalar boıynsha búdjetten qyrýar qarjy bólinip otyrady. Osyǵan baılanysty ekonomıkalyq tergeý qyzmeti memlekettik satyp alýlarǵa qatysatyn kásiporyndardyń salyq tóleý qyzmetin tekserip shyqty. Máselen, osy ýaqytqa deıin "Nurly jol" baǵdarlamasy boıynsha ıgerilgen aqshanyń sommasy 400 mlrd. teńgeden asty. Sol sıaqty "Óńirlerdi damytý" memlekettik baǵdarlamasy aıasynda bólingen 159 mlrd. teńge bar. Sondaı-aq "Samuryq-Qazyna" qory boıynsha berilgen qarjy az emes.
"Biz ózimizdiń aqparattyq júıelerimizdi paıdalana otyryp, atalǵan sanattar boıynsha taýar men qyzmetterdi jetkizip júrgen kásiporyndardyń salyq tóleý qyzmetine monıtorıń ótkizdik. Búdjet qarajatyn ıgerýdiń barlyq sanattary boıynsha salyqtan jaltarýdyń "sur", ıaǵnı zańsyz sxemalary anyqtaldy. Onda jalǵan kásipkerlik nysandardy qurý jáne taǵy basqa áreketterdi paıdalanǵan. Osyndaı kúdik týǵyzatyn kásiporyndardyń esep-qısaby 3 trıllıon teńgeni qurady. Aldyn ala boljam boıynsha búdjetke 1 trln. teńgeniń salyǵy tólenbeı qaldy",-deıdi QR Qarjy mınıstrliginiń Memlekettik kirister komıteti ekonomıkalyq tergeý qyzmetiniń basqarma basshysynyń orynbasary Abzal Baımanov.
Onyń sózine qaraǵanda, tekseris kezinde mamandar 1200 oryndyq 10 mektepti alyp, árbir aımaqta bir mekteptiń qurylysyna ketetin shyǵyndy salystyryp kórdi. Sonda birdeı mektepti salý shyǵyndarynyń aıyrmashylyǵy 900 mln.teńgeden 2 mlrd. teńgege deıin jetken.
"Sol on mektepti salǵandardyń ishinde 8 merdigerdiń salyq júktemesi tómen boldy. Bul degenimiz, ol kompanıalarda salyqtan jaltarý sxemalary bolǵan",- deıdi A.Baımanov.
Onyń aıtýynsha, búgingi zańnamaǵa sáıkes, tapsyrys berýshi oryndaýshy úshin jaýap bermeıdi. Sol sebepti ekonomıkalyq tergeý qyzmeti jergilikti bıliktiń arasynda túsindirý jumystaryn ótkizýmen shekteldi.
