Tamyzdyń 28-i kúni Ózbekstan Respýblıkasynyń úkimeti prezıdenttiń densaýlyǵy nasharlaǵanyn habarlasa, erteńine Islam Kármovtyń kishi qyzy Lola Karımova-Tılláeva ákesiniń "ınsýlt alyp, reanımasıaǵa túskenin" jazyp, onyń bolashaǵy týraly boljam jasamaýdy suraǵan bolatyn.

Al búgin 2 qyrkúıekte Reuters agenttigi "úsh dıplomatıalyq derek kózine" silteme jasap, prezıdent Islam Karımovtiń dúnıe salǵanyn málimdedi.

Al qazaqstandyq saıasattanýshy Erlan Karın óziniń Feısbýk paraqshasynda Ózbekstanda bılik aýysýynyń yqtımal úsh senarıin atady. 

"Ózbek saıasatynyń jabyqtyǵyn jáne jergilikti saıası elıta qurylymynyń ereksheligin eskere otyryp, bıliktiń qandaı senarılerimen aýysatynyn boljaý asa qıyn. Ázirbaıjandyq dep atalatyn senarıdiń - ıaǵnı, bılik ókilettigin otbasy múshesine berilýi – ekitalaı, tipti bul senarı iske aspaıdy dep senimmen aıtýǵa bolady. Ózbekistanda otbasy saıası yqpaldyń faktory retinde qalyptasa almady", - dep jazady saıasattanýshy. 

Saıasattanýshy Erdan Karınniń pikirinshe, yqtımal degen negizgi kelesi senarılerdi keltirýge bolady:

Birinshi – «Arnaýly qurylymdar». Elıtadaǵy birden-bir uıymdasqan top – arnaýly qurylymdar ókilderi qazirgi kezde toptasyp jumys jasaýǵa qabiletti jalǵyz kúsh. Jergilikti arnaıy qyzmet – Ulttyq qaýipsizdik qyzmeti ózbek bılik júıesindegi negizgi qurylym bolyp tabylady, jáne de syrtqy kúshtermen baılanystar osy qurylymdar arqyly júzege asyp kelgen bolatyn, al qazirgi jaǵdaıda bul da mańyzdy faktor.

Ekinshi - «Konsensýstyq fıgýra». Ózbek lıderiniń densaýlyǵy týraly resmı aqparatty prezıdent baspasóz-qyzmeti nemese prezıdent ákimshiligi qurylymdary emes, úkimettiń taratýy jergilikti bılik ıerarhıasynda premer-mınıstrdiń qandaı da bir yqpaldy róli bar ekendigin jáne onyń taq murageri retinde saılanýy múmkin ekendigin baıqatady.

Úshinshi – «Konstıtýsıalyq». Bul senarıdiń bolýy ekitalaı, desek te, ony múldem shyǵaryp tastaýǵa da kelmes. 2011 jyly Ózbekstannyń negizgi zańyna Memleket basshysyn aýystyrý sqemasyn naqtylaıtyn birqatar ózgerister engizildi: «Prezıdent óz mindetterin atqara almaǵan jaǵdaıda, onyń quzyretteri ýaqytsha Ózbekstan Respýblıkasy Joǵarǵy májilis Senatynyń tóraǵasyna júktelip, «Ózbekstan Respýblıkasynyń Prezıdentin saılaý týraly» Zańǵa sáıkes úsh aıdyń ishinde saılaý ótkizilýi tıis».

Osy atalǵan úsh senarıdi keltire otyryp, eń yqtımaly, ol aralasqan aralas nusqasynyń júzege asýy - ıaǵnı kúshtik qurylymdardyń baqylaýy arqyly ekinshi jáne úshinshi senarı júzege asýy múmkin ekenin aıtady saıasattanýshy.