Qazaqstan Respýblıkasynyń Premer-Mınıstri Kárim Másimov Reseı Federasıasynyń Premer-Mınıstri Dmıtrıı Medvedevpen kezdesti.

Kezdesý barysynda taraptar Keden Odaǵy, Eýrazıalyq Ekonomıkalyq Odaq aıasyndaǵy máselelerdi talqylady.

Kezdesý barysynda odaqtyń tımdiligine toqtalǵan D.Medvedev: «Keden Odaǵy aıasynda qatysýshy-múshe memleketterdiń arasyndaǵy saýda-sattyqta oryn alǵan kedergiler aıtarlyqtaı azaıdy. Munyń barlyǵy qarjy daǵdarysynyń saldaryn jumsartýǵa kómegin tıgizedi» dep atap ótti. Sondaı-aq ótken jyldyń nátıjesi boıynsha memleketter arasyndaǵy taýaraınalym kórsetkishi 64 mıllıard dollardan asqanyn málim etti. Dmıtrıı Medvedevtiń aıtýynsha, munyń barlyǵy óte mańyzdy sandar bolyp tabylady.

Qazaqstan, Reseı jáne Belorýssıa memleketteriniń arasynda qurylǵan Keden Odaǵy úsh memleket ekonomıkasynyń serpin alyp, damýyna negiz boldy.  Ekonomıkalyq daǵdarystyń beleń alý jaǵdaıyna qaramastan saýda-sattyq, kásipkerlik aıasyndaǵy yntamaqtastyq nátıjeli bola túsýde. Atap aıtqanda, 2013 jyldyń qorytyndysy boıynsha Qazaqstan ekonomıkasy 24,3 mlrd. AQSH dollaryna jetti. Bul 2010 jylǵy jaǵdaımen salystyrǵanda 29 paıyzǵa kóbirek. Keden Odaǵynyń bir nátıjeli tusyn osy sandardan-aq baıqaýǵa bolady.

  Keden Odaǵy aıasynda otandyq eksport kórsetkishiniń arta túskeni sózsiz. Salystyrmaly túrde alatyn bolsaq, 2013 jyly eksporttyń jalpy kólemi 5,9 mlrd. dollar bolǵan. Degenmen, álemdik qarjylyq daǵdarystyń qaýpi áli seıilgen joq. Daǵdarystyń aldyn alý, qajetti sharalar qoldaný – Keden Odaǵy aıasynda da keńinen qarastyrylǵanyn atap ótken jón.

Keden Odaǵynyń tıimdiligi – ulttyq ekonomıkamyzǵa ınvestıvıalyq klımatty jaqsartýǵa óz septigin tıgizdi deıdi sarapshy mamandar.

Kedendik Odaqtyń tıimdiligin elimizdegi kásipkerler de sezinýde. Máselen, kásipker Arman Baıqadam Keden Odaǵy aıasynda otandyq óndiris salasyna, sonymen qatar shaǵyn jáne orta bıznestiń jumysyna oń yqpal etkenin aıtady. Máselen, ol: «Keden Odaǵy elimiz úshin múmkindigi mol naryq bolary anyq. Jalpy kez kelgen ekonomıkalyq uıymnyń maqsaty bireý ǵana – ortaq naryq jasaý. Negizgi úsh prınsıpteri bar. Birinshi, ortaq naryqta kapıtaldyń kedergisiz aınalymyn qamtamasyz etý. Ekinshi, taýarlardyń, ónimderdiń ortaq naryq sheńberinde shekaradan kedergisiz ótý. Úshinshi, eńbek kúshiniń, ıaǵnı adamdardyń ortaq naryq aıasynda azamattyǵyna qaramastan, erkin jumysqa ornalasý jeńildigi» dep túıdi.

 Mine, mundaı mańyzdy máselelerdiń sheshilýine Qazaqstan, Reseı jáne Belorýssıa arasynda qurylǵan Keden Odaǵy óz septigin tıgizýde.

Qysqasha aıtqanda, álemde túrli baǵytta damytylyp jatqan ekonomıkalyq jobalar kóp. Al kórshiles eldermen ekonomıkalyq baılanystardy nyǵaıtýdyń máni tipti erekshe. Olaı bolsa, Keden Odaǵy aıasynda júzege asyrylyp jatqan is-sharalar memleketterdiń naryq salasyndaǵy báskelestikke qabilettiligin arttyratyny sózsiz.

Gúlnár Muratqyzy