Táýelsizdigimizdiń 25 jyldyǵy men Almaty qalasynyń 1000 jyldyǵy qarsańynda Bıbigúl Tólegenova vokalısteriniń halyqaralyq segizinshi baıqaýy ótedi. Bul shara táýelsiz Qazaqstan jas ánshileriniń bıik talǵamyn, ónerge degen tereń túsinigin qalyptastyrýdy maqsat etedi. Halyqaralyq baıqaý jas ónerpazdardyń nazaryn klasıkalyq jáne halyq ánderine aýdaryp, olardy naǵyz ónerdiń bulaǵynan sýsyndaýǵa shaqyrady. Án saıysy jańa talanttardyń esimin anyqtap, qazaq klasıkalyq ónerin asqaqtady ári jastardyń rýhanı kemeldenýine kómektesedi. Halqymyzdyń mádenıeti men onyń jan-dúnıesin qaltqysyz tanýǵa jol ashatyn tańdaýly týyndylar oryndalady. Oǵan qosa, Qazaqstan kompozıtorlary shyǵarmashylyǵynan da halyq ánderine uqsas týyndylar usynylady.

Dástúrli túrde uıymdastyrylatyn Bıbigúl Tólegenova vokalısteriniń halyqaralyq baıqaýy tek qana óner saıysy emes. Ol Almaty qalasy men qonaqtary asyǵa kútetin án merekesine aınalyp ketken.

Konkýrsqa 1984 jyldyń 1 qazany men 1997 jyldyń 1 qazany aralyǵynda ómirge kelgen ónerpazdar qatysa alady. Baıqaý irikteý jáne aqtyq kezeńnen turady. Barlyq tyńdalym el aldynda ótedi. Ánshilerdiń sahnaǵa shyǵý reti jerebe arqyly anyqtalady. Al sońǵy aqtyq kezeńde 12-14 qatysýshy baq synap, saıysqa túsedi.