RESEI "AŃYZ ADAM" MÁSELESİN HALYQARALYQ SAIASI QYSYM JASAÝ QURALYNA AINALDYRYP OTYR. ARANDATÝDAN SAQ BOLAIYQ.
Maǵan ár oblystan telefon shalyp, "Muhtar Shahanov "Ańyz adam" jýrnalyn qoldaý tobyn quramyz dep edi, sol topqa qalaı múshe bola alamyz? Biz óz oblysymyzda jýrnaldy qoldaý mıtıńisin ótkizsek qalaı bolady? Mıtıńi ótkizý úshin ruqsat suraý kerek pe?" degen suraqtar qoıyp jatyr. "Qazaq tilin bilmeıtin, jýrnaldy oqymaǵan orys shaldar men ákimshilikten tender alyp júrgen Ábdishúkirov, Pashevıch degen bireýler nege aýǵan soǵysy ardagerleriniń atyna kir keltiredi? Olarǵa jalpy aýǵan soǵysy ardagerleriniń atynan sóıleýge kim quqyq berdi? Olar Almaty qalasynyń ortasynda ruqsat etilmegen, qarýly mıtıń ótkizse, biz de dál sondaı mıtıń ótkizeıik. Sonyń ishinde birge bolyńyz, zańgerlik qoldaý kórsetińiz" degen jigitter de tabylyp jatyr. Qadirli azamattar, baýyrlar! Qazaq baspasózine ǵana emes, jalpy Qazaqstan táýelsizdigine qaýip tónip otyrǵany ras. Biraq, kóshege shyǵyp, órt shyǵaryp, tóbeles uıymdastyrý qazaqqa emes, eń aldymen sol arandatýshylyqty uıymdastyryp otyrǵan reseıshilderge kerek. Sondyqtan sál sabyr saqtap, resmı organdardyń áreketiniń aýjaıyn baıqap kóreıik. Qazir arasha túsý úshin tek Prezıdenttiń atyna top-top bolyp ár oblystan hat jazýǵa bolady. Qoǵamdyq uıymdar belsene at salyssa bolady. Zań buzýshylyqty eń aldymen resmı organdardyń ózderi bastap otyrǵanyna qaramastan, barynsha zań sheńberinde áreket etken jón. Al eger shynymen "Ańyz adamdy" zańsyz jaýyp, Jarylqap Qalybaıdy QR Qylmystyq kodeksiniń 164-baby boıynsha uzaq merzimge bas bostandyǵynan aıyrý qaýipi týyndasa, sol kezde jappaı sherýge shyǵý máselesin kóterý kerek dep oılaımyn. Jaı ǵana bir jýrnalda shyqqan maqalany, ıaǵnı, bolymsyz ǵana oqıǵany úlken halyqaralyq saıası máselege aınaldyryp otyrǵan Jarylqap emes, eń aldymen Reseı Federasıasy. Reseı Syrtqy ister mınıstrligi arnaıy nota jiberý arqyly birinshiden, táýelsiz Qazaqstannyń ishki isine aralasyp otyr, ekinshiden jalǵan aqparatty saıası kúsh kórsetý quralyna aınaldyrdy. Sondyqtan, arandatýdan saq bolyp, saıası da, quqyqtyq ta saýatty áreketter jasaıyq degim keledi.
Maqsat İlıasuly, zańger
