Búgin Parlament Senatynyń jalpy otyrysy ótti, - dep habarlaıdy Qamshy.kz.

Senat depýtaty retinde bul otyrysqa birinshi ret qatysqan Darıǵa Nursultanqyzyn áriptesteri Halyqaralyq qatynastar, qorǵanys jáne qaýipsizdik komıtetiniń tóraǵasy etip saılap aldy. Atalǵan komıtettiń burynǵy jetekshisi Ikram Adyrbekov ornyn bosatqan men sol qurylym quramynda qalatyn boldy.

Esterińizge salsaq, Darıǵa Nazarbaeva 13 qyrkúıek kúni Memleket basshysynyń Jarlyǵymen Senat depýtaty bolyp taǵaıyndalǵan bolatyn. bul taǵaıyndaý qoǵamda túrli boljamdardyń jasalýyna túrtki boldy. bireýler D. Nazarbaevanyń qatardaǵy senator bolyp qalmaıtynyn, palata tóraǵalyǵyna saılanatynyn boljasa, tanymal saıasattanýshy Aıdos Sarym Darıǵa Nursultanqyzynyń depýtat atanýyn saıası qyzmettegi quldyraýy dep baǵalaǵan edi. 

Qalaı bolǵanda da bul aýys-túıisterdiń túpki maqsaty bir qudaıǵa jáne osy rokırovkalardyń avtoryna ǵana málim. Senat quramyn jasaqtaýda prezıdenttiń birshama ókilettiligi baryn eskersek, Darıǵa Nursultanqyzynyń áli talaı sekiris jasaý múmkindigine ıe ekenin joqqa shyǵara almaımyz.