Bul is-sharaǵa sondaı-aq Ázerbaıjan Respýblıkasynyń Prezıdenti I.Álıev, Armenıa Respýblıkasynyń Prezıdenti S.Sargsán, Belarýs Respýblıkasynyń Prezıdenti A.Lýkashenko, Qyrǵyz Respýblıkasynyń Prezıdenti A.Atambaev, Reseı Federasıasynyń Prezıdenti V.Pýtın, Tájikstan Respýblıkasynyń Prezıdenti E.Rahmon da qatysty, - dep habarlaıdy Qamshy.kz Aqorda saıtyna silteme jasap.
Qazaqstan Prezıdenti otyrys Dostastyqtyń qurylýynyń mereıtoıy jylynda ótip otyrǵanyn aıtty.
– 1991 jyly qol qoıylǵan Almaty deklarasıasy arqyly negizi qalanǵan Táýelsiz memleketter dostastyǵy búginde elderimizdi jaqyndastyra túsetin biregeı alań bolyp qala beredi. Bizdiń Dostastyq jumysyn jalǵastyryp jáne bolashaqqa degen josparlardy iske asyra otyryp, óziniń ómirsheńdigin, tıimdiligin jáne perspektıvalylyǵyn dáleldedi. Sondaı-aq, Dostastyqtyń tájirıbesi EAEO jáne SHYU tárizdi ıntegrasıalyq uıymdarǵa da septigin tıgizdi. Osylaısha, Almatyda 1991 jyly 21 jeltoqsanda TMD-nyń qurylýy zor tarıhı mánge ıe boldy. Meniń bastamam boıynsha búgin biz TMD-nyń 25 jyldyǵy jóninde málimdeme qabyldap otyrmyz. Ol baǵdardy aıqyndap, aldymyzǵa jańa mindetter qoıady, – dedi Nursultan Nazarbaev.
Sonymen birge Memleket basshysy jaqynda ótken G-20 samıtinde álemdik ekonomıkanyń ornyqty damýyn qamtamasyz etý úshin ekonomıkalyq saıasatty úılestirý týraly ýaǵdalastyqqa qol jetkizilgenin atap ótti.
– Samıtte damýdyń eskirgen modelin almastyrý jáne jahandyq ındýstrıalyq revolúsıadan soń kelgen jańa sandyq ekonomıkaǵa kóshý máseleleri talqylandy. Bul – energıanyń jańa túrine, valútanyń jańa sanatyna jáne qoǵamdyq qarym-qatynastyń jańa formalaryna negizdelgen qoǵamdyq óndiristiń jańa tásilin tabý men ıgere bastaýdyń nyshany. Jańa problemalar aldynda TMD aıasynda bizge de tyǵyz ózara is-qımyl jasap, birlesken jobalardy jandandyrý qajet, – dedi Nursultan Nazarbaev.
Qazaqstan Prezıdenti Dostastyqtyń qazir 2008 jyly qabyldanǵan ekonomıkalyq damý strategıasyn iske asyrýdyń úshinshi kezeńine kóshkenine nazar aýdardy.
– Qazirgi ýaqytta álemdik ekonomıkadaǵy jaǵdaı aıtarlyqtaı ózgerdi. Sondyqtan Qazaqstan Dostastyq elderiniń ekonomıkalyq damýyna serpin berýge arnalǵan sharalar jıyntyǵyn jandandyrý túsýdi usyndy, – dedi Memleket basshysy.
Budan bólek, Qazaqstan Prezıdenti TMD elderin damytýdaǵy kólik-tranzıt áleýetin tıimdi paıdalanýdyń mańyzdy rólin atap ótti.
– Keı jaǵdaıda aýqymdy kólik-tranzıttik jobalardy iske asyrýda elder arasynda bir-birin qaıtalaý kezdesip qalady, ózara kelisýdiń jetispeıtindigi baıqalady. Osyǵan baılanysty, bul saladaǵy saıasatymyzdy úılestirý qajet. Bul jobalarymyzdyń tıimdiligin edáýir arttyrýǵa múmkindik beredi, – dedi Nursultan Nazarbaev.
Sonymen birge, Elbasy ótken jolǵy kezdesýde TMD-ny zamanaýı jaǵdaıǵa beıimdeý qajettigi jónindegi ýaǵdalastyqqa qol jetkizilgenin keńeske qatysýshylardyń esine saldy.
– Taraptardyń belsendi ózara is-qımyly arqasynda Dostastyqtyń tıimdiligin arttyratyn naqty sharalar ázirlendi. TMD qyzmetin jetildirip, onyń fýnksıonaldyq ıkemdiligine qol jetkizý úshin turaqty túrde jumys júrgizip otyrý qajet, – dedi Qazaqstan Prezıdenti.
Sońynda Memleket basshysy TMD-ǵa 2017 jyly Reseı Federasıasynyń tóraǵalyq etýi jónindegi sheshimdi Qazaqstannyń quptaıtynyn jetkizdi.
