Almaty oblysynda 2019 jylǵa deıin barlyq apatty kópirler tolyqtaı qalpyna keltiriledi. Bul týraly OKQ-da baspasóz konferensıasynda Almaty oblysy ákiminiń orynbasary Baqtıar Ónerbaev habarlady.

Onyń derekterine sáıkes,  qazirgi ýaqytta Almaty oblysynda 103 kópir apatty jaǵdaıda tur.

«Qazir apatty kópirlerdi qalpyna keltirý jumystary júrgizilýde. Jobalaý-smetalyq qujattama ázirlendi, barlyq materıaldar saraptamaǵa jiberildi. Memlekettik saraptama alǵannan keıin jergilikti búdjetten qalpyna keltirý úshin qarajat bólinedi. Qadamdyq jospar, baǵdarlama ázirlendi, oǵan sáıkes 2017-2019 jyldary barlyq kópirler qalpyna keltiriledi», - dedi jýrnalıserdiń suraǵyna jaýap bergen oblys ákiminiń orynbasary.

Eske salsaq, ákimdik derekterine sáıkes, Almaty oblysynyń óńirlik mańyzy bar joldarynda búginde 244 kópir ornalasqan. Onyń jartysy apatty jaǵdaıda.

Almaty oblysy ákimdiginiń derekterine sáıkes 2016 jylǵy 1 tamyzda memlekettik búdjetke 139,2 mlrd teńge tústi, boljam 111,2%-ǵa oryndaldy. Respýblıkalyq búdjetke 64,1 mlrd. teńge tústi jáne boljam 112,1%-ǵa oryndaldy, jergilikti búdjetke  - 75,1 mlrd. teńge (110,5%) tústi.