Búgin Astanada Táýelsizdiktiń 25 jyldyǵyna arnalǵan Almaty oblysynyń Astanadaǵy «Qýatty aımaq - qýatty Qazaqstan» atty kúnderi aıasynda birneshe aýqymdy sharalar bolyp ótti, dep habarlady Almaty oblysy ákiminiń baspasóz qyzmeti. 

Ulttyq kitaphanada «Jeruıyq meken - Jetisý» atty jetisýlyq aqyn-jazýshylar kitaptarynyń kórmesi uıymdastyryldy. Kórmege kelýshiler kıeli Jetisý jeriniń aqyn-jazýshylarynyń qalamynan týǵan shyǵarmalarymen keńinen tanysýǵa múmkindik aldy.

Sondaı-aq osy kúni Ulttyq murajaıda da kórme uıymdastyryldy. Kórmege Almaty oblysy murajaılaryndaǵy eksponattar, jyr alyby Jambyl Jabaevtyń qoldanǵan jeke zattary, kóne ydystar, turmystyq jáne zergerlik áshekeı buıymdar, ózge de kóptegen ekponattar qoıyldy. Sonymen qatar kórmege jetisýlyq qylqalam sheberleriniń porter, peızaj jáne tarıhı taqyryptaǵy shyǵarmalary da qoıyldy. Búgingi kúnge josparlanǵan sharalar sońy «Jastar» teatrynyń sahnasynda Almaty oblysynyń B. Rımova atyndaǵy drama teatry ártisteriniń oryndaýyndaǵy «Kereı - Jánibek» atty spektaklin qoıýmen óz máresine jetti.

Osylaısha Almaty oblysynyń delegasıasy oblys kúnderi sheńberinde ázirlegen baǵdarlamasynyń birinshi kúni Elordalyq turǵyndar men qala qonaqtarynyń kóńilinen shyǵyp, ystyq qoshemetine bólenip úlgerdi.

Erteńgi kúni de astanalyqtardy tańnyń atysynan keshtiń batysyna deıin qyzyqty sharalarǵa toly kún kútýde...