Buryndary «Shetelde qoqystan da qajetti dúnıeler ja­sa­lypty» degendi jıi estıtinbiz. Mundaı jumys qazir bizdiń elde de júzege asyryla bastady. İle aýdanyndaǵy «Kompanıa V» jaýapkershiligi shekteýli seriktestigi dál osyndaı isterdi qolǵa alyp, qaǵaz qaldyqtaryn óńdeýmen aınalysýda.

İstiń qyr-syrymen jaqyn ta­nysyp, jumys úrdisin kórý úshin zaýytqa arnaıy bardyq. Atshap­tyrym aýmaqta orna­lasqan kásip­orynda tynymsyz tirlik júrip jatty. İshine engen mezette-aq taý-taý bolyp úıil­gen qaǵaz qal­dyq­ta­ryna nazar aýdardyq. Qoqystar kóz aldy­myzda qaıta óńdeýden ót­kizilip, áp-sátte daıyn ónimge aınaldy. Sol zattardan karton, qorap sıaqty buıymdar jasalýda. Óndiris ornynyń basshysy Vadım Dolgopolovtyń aıtýyn­sha, ne­gi­zi­nen olar arnaıy tap­syrys boıyn­sha jumys isteı­tin kórinedi. Bas­tap­qy jyl­dary isti aıaqtan turǵyzý ońaı bolmapty. Soǵan moıymastan tek alǵa jyljyp, jumysty jan­dan­dyrýda talmaı eńbek etken. Memleket tarapynan jasalǵan kómek­terdiń de oń áseri tıipti.

Byltyr «Bıznestiń jol karta­sy – 2020» memlekettik baǵdar­la­ma­sy aıasynda 6 paıyz­ben 33 mıl­lıon teńgeden astam nesıe alyp, jańa qondyrǵylar satyp alynǵan. Qazirgi kezde qaǵaz shyǵarý úrdisi sol quryl­ǵylardyń kúshimen avto­mat­ty túrde júzege asyrylýda. Al onyń tetikterin arnaıy ju­mys­shylar basqarady. Munda júzden asa adam eńbekpen qam­tylǵan. Ba­sym bóligi jastar jáne sol óńir­diń turǵyndary. Olarǵa orta esep­pen júz myń teńgeden asatyn ja­la­qy tó­lenedi. Aıta keteıik, zaýyt­ta táýligine 20 tonna, aıyna 750 ton­na­dan astam qaǵaz óńdeledi. Qaldyq ne­gizinen Almaty qa­lasy jáne ob­lys aýmaǵynan jınap áke­­li­nedi. Shil­de aıyn­da Qyr­ǵyz eline 200 tonna óńdel­gen qa­ǵaz eks­port­tal­ǵan.

Aıta keteıik, kásiporynnyń jumys istep kele jatqanyna on bes jylǵa jýyqtapty. Sodan beri talaı istiń basyn qaıyryp úl­ger­gen óndiris ujymynyń búgingi tirlikteri jaman emes. Oǵan qor­sha­ǵan ortany las­tanýdan saqtap, ekologıalyq jaǵdaıdy jaq­sar­tý­ǵa úles qo­syp otyrǵandary dálel. Keıbir málimetterge súıensek, eger bir tonna qaǵaz qaıta óńdeý­den ótse, on alty aǵash saqtalatyn kó­rinedi. Sondaı-aq, bul jumys aǵash óńdeýge qaraǵanda qýat ja­ǵy­nan únemdi ári eko­lo­gıa­lyq tur­ǵydan tıimdi óndiris bolyp ta­bylady. Sondyqtan, atalmysh kásip­orynnyń atqa­ryp jatqan ju­mystary úlgi tu­tarlyq  deýge bo­lady. 

Aıgúl Baıbosynova, "Jetisý" gazeti