Keler jyly respýblıka aýmaǵynda aýylsharýashylyǵy maqsatyndaǵy jáne jeke turǵyn úı qurylysy men jeke qosalqy sharýashylyqqa arnalǵan jer ýchaskelerin tekserý bastalady, - dep habarlaıdy Qamshy.kz.
Bul týraly Úkimet janyndaǵy Jer reformasy jónindegi komısıa quqyqtyq jumys tobynyń jetekshisi, Parlament Májilisindegi birqatar zańnamalarǵa ózgerister men tolyqtyrýlar engizý jónindegi jumys toptarynyń múshesi Muhtar Taıjan málimdep, Feısbýk jelisinde «Aýylsharýashylyǵy maqsatyndaǵy jáne jeke turǵyn úı qurylysy men jeke qosalqy sharýashylyqqa arnalǵan jer ýchaskelerin tekserý boıynsha usynystyń» mátinin jarıalady.
Premer-mınıstrdiń tapsyrmasymen júrgiziletin tekseris merzimi 2017-2018 jyldarǵa belgilengen. Tekseris barysynda Aýylsharýashylyǵy maqsatyndaǵy jáne jeke turǵyn úı qurylysy men jeke qosalqy sharýashylyqqa arnalǵan jer ýchaskeleriniń naqty jaǵdaıy, zań talaptarynyń saqtalýy, aýylsharýashylyq jerleriniń sapalyq jaı-kúıi anyqtalyp, jerdi tıimdi paıdalaný jónindegi sharalar kesheni qabyldanbaq. Sondaı-aq, tekseris nátıjesi boıynsha halyqtyń suranysyn qanaǵattandyrý maqsatynda jaıylym, shabyndyq jáne jeke úı qurylysyna arnalǵan arnaıy Jer qory qurylmaq.
Tekserý tek aýylsharýashylyq, turǵyn úı salý jáne qosalqy sharýashylyq úshin berilgen jerlerge ǵana emes, memlekettik qordaǵy jerlerge de júrgiziledi. Ol jumystar úshin tıisti komısıalar qurylyp, quramyna múddeli azamattar enetin bolady. Al, respýblıkalyq deńgeıdegi komısıa premer-mınıstr sheshimimen qurylyp, erejesi bekitilmek.
Birneshe satydan turatyn tekserýdiń ár satysynan keıin jer ýchaskeleriniń paıdalanylýy, jaı-kúıi, zańnamalardyń saqtalýy, taǵy basqa máseleler boıynsha taldaý júrgizilip, tıisti usynystar ázirlenýi tıis.
Esterińizge salsaq, qazir Parlament depýtattary «Jer kodeksine» jáne jer qatynastaryna baılanysty birqatar zańnamalarǵa ózgerister men tolyqtyrýlar engizý týraly», «Jaıylym jerler týraly» jańa zań jobasy qaralyp jatyr.
