Úkimet otyrysyn ótkizgen Premer-mınıstr eldegi baǵanyń ósýine baılanysty osyndaı pikir bildirdi, - dep habarlaıdy Qamshy.kz.

«Birinshi kezekte biz baǵanyń óspeýin qadaǵalaý kerekpiz. Maýsymdyq ózgeristerge baılanysty sebepteri bar, túsinemiz. Biraq, baǵa kóp jaǵdaıda tıisti sheshimder qabyldanyp, alaıda, bizdiń ózimizdiń shara qoldanbaýymyzdan ósýde. Men aıtylǵan usynystarmen tolyq kelisemin, bizde óndirist, saýda-sattyqty qoldaıtyn, baǵany ustap turatyn tetikter bar, biraq, olar jumys istemeıdi, óıtkeni, jer-jerlerde ákimder tarapynan baqylaý joq, barlyq ýaqytta ana jerde jaqsy, myna jerde jaman dep, qaıdaǵy bir sandar tóńireginde saýdalasamyz», - degen B. Saǵyntaev baǵany retteýde júıeli jumys kerektigin basa aıtty.

«Bizdiń keı áriptesterimiz laýazymǵa taǵaıyndala sala júıelik sharalar qabyldaý ornyna bazarlardy aralap, baǵalardy tekserýge qumar. Ony bárimiz kórip otyrmyz. Solardyń barlyǵy ózderi barar aldynda bazarlardaǵy baǵalardyń da qajetti somaǵa «jańartylyp» qoıylatynyn da biledi. Tekseris ketken soń ol baǵalar qaıtadan ózgertiledi. Sondyqtan, biz ózimizde shyǵarylatyn azyq-túlik baǵasynyń óspeýi úshin naqty júıelik sharalar qabyldaý kerekpiz», - deıdi premer-mınıstr.

Baqytjan Saǵyntaev sondaı-aq, baǵanyń qymbattaý sebebine úńilmeı, túrli syltaýlardy alǵa tartatyndardy da synǵa aldy.

«Eger siz elektr energıasynyń baǵasynyń ósýin aıtsańyz, onyń belgili bir taýar baǵasyna qanshalyqty áser etkenin kórsetińizder. Retteýishter bar. Janar, jaǵar maı baǵasyn biz bıyl emes, byltyr kóterdik. Al, qazir kelip taǵy da janar maı baǵasyn syltaýratamyz. Bul bárinen basyn alyp qashý bop sanalady», - degen B. Saǵyntaev Ulttyq ekonomıka mınıstri Qýandyq Bishimbaeva Aýylsharýashylyǵy mınıstrligimen birlesip, bir aı ishinde naqty sharalar qabyldaýdy, ol sharalardyń naqty nátıjelerin usynýdy tapsyrdy.