Barlyǵymyzdyń balalyq shaǵymyzdaǵy súıikti kınomyz «Kókserek» fılmi bolǵany jasyryn emes. Odan buryn qazaqtyń dara, dańqty jazýshysy Muhtar Áýezovtiń qalamynan týǵan biregeı týyndynyń da talaı jas oqyrmandy baýrap alǵany sózsiz. Endi mine, óz oqyrmany men kórermenine súıkimi artqan týyndynyń múltfılmdik nusqasy jaryqqa shyqty, dep habarlaıdy Qamshy.kz BAQ.kz –ke silteme jasap.
"KADAM" stýdıasy túsirgen 15 mınýttyq múltfılm kórermenniń kózaıymyna aınalar biregeı eńbek ekenin baıqaýǵa bolady. Osy balalar fılminiń treılerin jarıalaǵan Saltan Saıranulynyń jazýyna qaraǵanda fılmdi jasap shyqqandar áli stýdent jastar eken.
««Baıqońyr» atty jas kınematografısterdiń qysqa metrajdy fılmderi kınofestıvaline «Kókserekti» alyp keldik, erteń «Kóktóbede» kórsetedi, sizge bıletimiz bar, kelińiz» dep kóńilimdi kókke bir kóterip tastady. Qýana-qýana bardym.
Múltıplıkasıalyq fılmderdiń shymyldyǵy osy «Kókserekpen» túrildi. Sóz joq, múltfılm keremet shyqqan. Jigitterdiń «Warner bros», «Walt Disney Pictures», «Pixar» sekildi stýdıalardyń izin basyp kele jatqan jas býyndar ekenine kózim jetti. Óte talantty, sheber, ónerli. Bul jigitter áli ýnıversıtet stýdentteri. Biraq shyǵarmalary qanshama jyldyq tájirıbesi bar sheberlerden asyp túspese, kem túspeıdi» - deıdi Saltan Saıranuly.
Sultan Jumabekuly, Meıirjan Sandybaı jáne Ádilbek Baıan esimdi jigitterdiń qolynan shyqqan týyndyǵa 21600 kartına syzylypty. 2D formatymen jasalǵan kishkentaı «Kókserek» balalar úshin taptyrmaıtyn mýltık bolary sózsiz.
«Búginde muhıttyń ar jaǵyndaǵy Amerıka men Batys balalarymyzdy ózderiniń arsyz, mánsiz múltfılmderi arqyly ýlaýda. Al biz oǵan qarsy ımýnıtetke áli aqsha aıaýdamyz. Kórsetetinimiz eńbeksiz jurtty aldap júrgen alaıaq «Aldarkóse». Odan qalsa, mentalıtetimizge bes qaınasa sorpasy qosylmaıtyn sheteldik ónimder. Bulardyń qasynda «Kókserek» áldeqaıda artyq» - deıdi Saltan Saıranuly.
Rasymen bizdiń dúnıetanymymyzǵa, ulttyq bolmysymyzǵa múlde kereǵar batystyq atys-shabys, qyryp-joıýǵa qurylǵan, balany tek qatygezdikke tárbıeleıtin mýltfılmderden góri, tabıǵatymyzǵa jaqyn, mentalıtetimizge úılesetin dúnıelerdi kórsetý arqyly balalarymyzdy jaqsylyqqa tárbıeleýge ne kedergi?!
Múltfılmniń sońy da óte ádemi aıaqtalady. Ómir boıy adamdar arasynda tirlik keshken Kókserek: «Endi túsindim... Sonaý túnnen beri meni elirtip shaqyryp júrgen ǵajaıyp ún – kirshiksiz taza tabıǵatymnyń, qaıtpas qaısar aıbatymnyń, eshnársege teń kelmes erkindigimniń úni» - deıdi.
Budan ulttyq bolmysty, rýhty, namysty, tıǵatpen bite qaınasqan qazaqy erkindikti baıqaýǵa bolady.
