Bıyl 150 jyldyǵy el kóleminde atalyp jatqan Alash arysy Álıhan Bókeıhannyń esimi Qaraǵandy qalasynyń bir aýdanyna beriletin boldy, - dep habarlaıdy Qamshy.kz.

Bul týraly súıinshi habarmen Qaraǵandy oblysynyń ákimi Nurmuhambet Ábdibekov mereıtoılyq jıynda bólisken.

«Qadirli aǵaıyn! Eń aldymen, sizderdi Alash qozǵalysynyń kósemi, ardaqty arysymyz Álıhan Bókeıhannyń 150 jyldyq mereıtoıymen shyn júrekten quttyqtaımyn!
Álıhan Nurmuhameduly – el erkindigi úshin kúres jolynda máńgi ólmeıtin iz qaldyrǵan, bar ǵumyryn qazaq halqynyń ulttyq saıası bostandyǵy men derbestigine arnaǵan uly tulǵa. Alash yntymaǵynyń, ulylyǵy men qýattylyǵynyń dińgegi. Ult máıegi. Máńgilik soǵar júregi dep aıtýǵabolady.
Al Alash kóseminiń ómir boıǵy ustanǵan: «Tiri bolsam qazaqqa qyzmet qylmaı qoımaımyn» degen qaǵıdasy búgingi urpaqqa úlken ónege. 
Aldaǵy ýaqytta Qaraǵandy oblysynyń ortalyǵynda Álıhan Bókeıhannyń eskertkishin ornatý, Qaraǵandydaǵy bir aýdannyń atyn Alash arysymen ataý josparlanyp otyrǵanyn qýanyshpen jetkizgim keledi. Sonymen qatar, Qaraǵandy oblysy ákimdiginiń qoldaýymen tuńǵysh ret Álıhan Bókeıhannyń tolyqqandy 15 tomdyǵy jaryq kóredi. Meniń qolymda qazir alǵashqy 2 tomy. Jalǵasyn áli de tabatyn bolady. 
Árıne, bul keleshek urpaqty ulttyq muratqa tartýdyń, Otansúıgishtikke tárbıeleýdiń birden-bir joly dep bilemin. Eń bastysy bul — kóptiń tilegi», - depti N. Ábdibekov.