Qurmetti «Qamshy» portaly! Ótken aptada qapyda ketken úsh birdeı azamatymyzdan kóz jazyp qalǵan kúnnen bastap, kúni keshege deıin olarǵa amandyq tilep, alańdaǵan jurttyń aldynda boldyńyzdar. Ol úshin barsha oqyrmandaryńyzdyń atynan alǵys bildiremiz.
Keshegi kún qabyrǵamyzǵa batty, sharasyz kúıge tústik. Sizder arqyly baýyrlarymyzǵa joqtaý, aǵaıyn-týysqa toqtaý aıtaıyn dep otyrmyz. Úsh jigit te qazaq eline qaıratymen kelgen, mahabbatymen kelgen, eńbegimen kelgen, el - jurtymen kelgen azamattar edi. Úsheýi de azat Otanǵa ósip-ónýdi, urpaǵyn máńgilik eldiń, máńgilik halqy etýdi maqsut etip kelgen eńbek adamdary edi. Qysqa ómiriniń sońǵy kúnine deıin sol maqsuttan taıǵan joq. Basqa qazaqty aıtpaǵanda, qazaq eline Shyńjańnyń ózinen-aq osyndaı jigitter on myńdap oraldy. Olar bos qalǵan jaılaýǵa jan bitirgen, bazarǵa mal toltyrǵan eńbeqor er jigitter ekenin kórip júrdik.
Búgin úsh birdeı azamatymyz armanda ketti... Aldanyp ketti... Olarda senim boldy, sezik bolmady. Olar adaldyǵyna aldandy, olar ańǵaldyǵynan aldandy, olar aǵaıyn keıpindegi albastylarǵa aldandy.
Osy qanquıly oqıǵaǵa baılanysty áleýmettik jeli órtenip tur. Meniń paraqshama da ońdy-soldy hattar túsip jatyr. Mundaıda kisi shamshyl bolady ǵoı. Keıbiri betińe batpaq shashqandaı pıǵyl tanytady. Olarǵa aıtarymyz: Qandyqoldardyń qandaı deńgeıli qylyǵy, qandaı qanquıly qylmysy Qazaq Eliniń bıik qasıetine, qazaq bitkenniń Qazaqstanǵa degen ólsheýsiz mahabbatyna kedergi bola almaıdy, Qazaq bitkenniń toptasý jolyndaǵy qaısar rýhy men qajyrly kúresin, qasıetti kóshin toqtata almaıdy.
Osy jáne osyndaı oqıǵalardy paıdalanyp alystaǵy qazaqty Qazaqstanǵa qarsy qoıǵysy keletin pıǵyl bolsa, ondaılardyń orny osy qandyqoldardyń qatarynda. Aıyrmasy qandyqoldar jazasyn alady, olardyń qylmysyn paıdalanyp úreı taratqandar, Qazaq degen sheksiz qasıetti uǵymǵa qara kúıe jaqqysy keletinder qaltarysta qalady. .
Mezgilimen kelgen qaza – jubanysh, mezgilsiz kelgen qaza – kúıinish! Kún ashyq, jer jazyqta jazym bolǵan, qyrshyndarynan qıylǵan bozdaqtarymyzdyń kúıigi kómeıge keptelip tur. Otanymyzǵa keldik, osynda ósip-ónemiz dep keldik, Alla bergen yryzdyqty osy topyraqta tatamyz dep keldik, mezgili kelgende osy topyraqta jatamyz dep keldik. Tipti, mezgilsiz ketsek te osy topyraqqa batamyz dep keldik. Qyrshyn ketken azamattarymyzdy da osy topyraqqa tapsyramyz. Dolanuly Jarqynbekti, Zarlyhanuly Muqıatty, Álimhan Qarlybekti ózderi otaýyn kóterip, oshaǵyn tutatqan Jetisý topyraǵyna tapsyramyz.
Jigitterdiń jubaılaryna, balalaryna, týystaryna, el-jurtyna kóńil aıtamyz! Urpaq ósedi, Ýaqyt kóshedi, Qaıǵy óshedi, Qazaqstanǵa qazaq tolady, Qazaqstan uly el bolady!
Sheıitterdiń ımany joldas bolsyn!
Almas Ahmetbekuly
