Búgin Astanada Májilis Spıkeri N. Nyǵmatýlınniń tóraǵalyǵymen Inovasıa, tehnologıa jáne bilim máseleleri jónindegi Astana Parlamentaralyq forýmy bastaldy,-dep habarlaıdy Qamshy.kz.
20 dan astam elderdiń parlamentshileri men sarapshylary, sondaı-aq, halyqaralyq uıymdardyń ókilderi jınalǵan mańyzdy forýmda Májilis Tóraǵasy qatysýshylarǵa quttyqtaý sózin arnaı kelip, elimizde alǵash ret uıymdastyrylyp otyrǵan osy forýmnyń Qazaqstan táýelsizdiginiń 25 jyldyq mereıtoıy qarsańynda ótýine aıryqsha nazar aýdardy.
Májilis Spıkeri atap ótkendeı, osy ýaqyttyń ishinde Qazaqstan Respýblıkasynyń Tuńǵysh Prezıdenti Nursultan Ábishuly Nazarbaevtyń kóregen saıasatynyń arqasynda bizdiń elimiz ekonomıkasy qýatty, birligi myqty, bolashaǵy aıqyn abyroıly memleketke aınaldy.
Odan ári Májilis Tóraǵasy Prezıdentimiz Nursultan Ábishuly Nazarbaevtyń táýelsizdik alǵan kúnnen bastap Azıamen, sonyń ishinde Islam elderimen yntymaqtastyqqa asa mán berip kele jatqanyn aıtyp, sonyń nátıjesinde Islam qaýymdastyǵy elderimen aımaqtaǵy turaqtylyqty, qaýipsizdikti nyǵaıtý, bilim, ǵylym jáne Islam mádenıetin damytý baǵytynda jetken jetistikterdiń kóp ekenin, sonyń ishinde, dinaralyq jáne ultaralyq tatýlyqtyń «qazaqstandyq modeli» qalyptasýy álem elderine úlgi bolyp otyrǵanyna toqtaldy.
Óz sózinde:-Qazaqstanymyz árqashanda álemdik ıntegrasıa ıdeıasyn qoldap, kóptegen halyqaralyq uıymdardyń belsendi jáne bedeldi múshesi atandy. Onyń naqty dáleli memleketimizdiń Birikken Ulttar Uıymy Qaýipsizdik keńesiniń 2017-shi – 2018-shi jyldarǵa arnalǵan turaqty emes múshesi bolyp saılanýy. Osynyń barlyǵy, álem elderiniń Qazaqstanǵa degen senimi óte joǵary bolýynyń jarqyn kórsetkishi,-dep atap ótti N. Nyǵmatýlın.
Forým jumysyna ISESKO-yń Bas dırektory Abdýlazız Osman Al-Týeıdjrı óziniń beıne quttyqtaýyn joldady.
Mańyzdy forýmdy uıymdastyrýshylar Qazaqstan Respýblıkasy Parlamenti Májilisi men Bilim, ǵylym jáne mádenıet máseleleri jónindegi Islam uıymy (ISESKO) jáne Islam Damý Banki.
Eki kúnge sozylatyn Astana parlamentaralyq forýmy negizgi jeti taqyryptyq sesıa aıasynda ótkizildi.
Alǵashqy kúni, bilim, tehnologıa jáne ınovasıa salasyndaǵy saıasat boıynsha talqylaý usynylady.
Kún tártibinde sondaı-aq, jahandaný aıasyndaǵy bilim men ǵylym salalaryn damytý úshin zańnamalyq baza qalyptastyrý máseleleri, ulttyq baǵdarlamalar men basymdyqtardy iske asyrýdaǵy ulttyq ınstıtýttarmen qarym-qatynas joldary men ondaǵy parlamentarıa róli máseleleri qarastyrylǵan. Naqty aıtqanda, óndiristik sektorda ǵylymı tehnıkalyq ólshemder týraly suraqtar qaralady.
