Astana qalasyndaǵy №2 Esil aýdandyq sotynda Seıitqazy jáne Áset Mataevtardyń isi boıynsha sot otyrysy odan ári jalǵasýda. Búgin ótken taraptardyń pikir saıysynda prokýror Erjan Quraqbaev Seıitqazy Mataevty jeke múlkin kámpeskeleýmen jáne ómir boıy kásipkerlik qyzmetpen aınalysýǵa tyıym salýmen qosa 6 jyl 8 aıǵa bas bostandyǵynan aıyrýdy surady. Sonymen qatar, Áset Mataevty kináli dep taýyp, jeke múlkin kámpeskeleýmen qosa 6 jylǵa bas bostandyǵynan aıyrýdy surady.
Prokýror sot tergeýi nátıjesinde taǵylǵan aıyptar boıynsha Seıitqazy jáne Áset Mataevtardyń kinási tolyq kólemde anyqtalǵanyn jáne sotqa usynylǵan aıyptaýlardyń negizinde dáleldengenin aıtty. «Osyǵan oraı, Mataev Seıitqazynyń qylmystyq áreketterin Qylmystyq kodekstiń 190-shy babynyń 4-shi tarmaǵynyń 2-shi tarmaqshasy boıynsha, ıaǵnı alaıaqtyq – aldyn-ala bir top adamdarmen sóz baılasyp, aldaý men senimdi teris maqsatqa paıdalaný jolymen bótenniń múlkin urlady, óziniń qyzmet babyn paıdalanyp, birneshe ret memlekettik satyp alý salasynan iri kólemdegi aqsha urlady jáne Qylmystyq kodekstiń 245-inshi babynyń 3-inshi tarmaǵy boıynsha, ıaǵnı asa iri kólemdegi deklarasıa tapsyrý mindetti bolǵan jaǵdaıda deklarasıa tapsyrmaý jolymen búdjetke salyq tóleýden jaltardy dep túpkilikti belgileý kerek»,- dedi sotta Erjan Quraqbaev.
Memlekettik aıyptaýshy Seıitqazy Mataevqa qatysty aıyptaýshy taraptyń eshqandaı jazasyn jeńildetetin jaǵdaıdyń (mundaı jaǵdaı Qylmystyq kodekstiń 53-inshi baby boıynsha qarastyrylǵan) joqtyǵyn aıtty. «Joǵaryda aıtylǵandardyń negizinde, Qylmystyq kodekstiń 58-inshi babynyń 3-inshi tarmaǵy boıynsha Mataev Seıitqazy Beısenǵazyulyna jeke múlkin kámpeskeleýmen jáne ómir boıy kásipkerlik qyzmetpen aınalysýǵa tyıym salýmen qosa 6 jyl 8 aıǵa bas bostandyǵynan aıyrý jazasyn taǵaıyndaýdy suraımyn. Jazasyn jalpy tártiptegi eńbekpen túzeý kolonıasynda ótesin»,- dep sózin jalǵady prokýror.
Aıta keterligi, memlekettik aıyptaýshy Seıitqazy Mataevtyń uly – Áset Mataevty da Qylmystyq kodekstiń 190-shy babynyń 4-shi tarmaǵynyń 2-shi tarmaqshasy boıynsha (alaıaqtyq – aldyn-ala bir top adamdarmen sóz baılasyp, aldaý men senimdi teris maqsatqa paıdalaný jolymen bótenniń múlkin urlaý, óziniń qyzmet babyn paıdalanyp, birneshe ret memlekettik satyp alý salasynan iri kólemdegi aqsha urlaý) kináli dep taýyp, múlkin kámpeskeleýmen jáne ómir boıy kásipkerlik qyzmetpen aınalysýǵa tyıym salýmen qosa 6 jylǵa bas bostandyǵynan aıyrý jazasyn taǵaıyndaýdy surady. Oǵan da jazasyn jalpy tártiptegi eńbekpen túzeý kolonıasynda óteý suraldy.
Erjan Quraqbaev óz sózinde sottan Seıitqazy jáne Áset Mataevtardan búdjetke tólenbegen salyq túrindegi 216 952 683 teńgeni óndirip alý jónindegi prokýrordyń shaǵymyn, sondaı-aq «Qazaqtelekom» AQ-nyń 143 960 753 teńgesin jáne Baılanys, aqparattandyrý jáne aqparat komıtetiniń 169 000 000 teńgesin óndirip berý týraly shaǵymdyq talaptaryn tolyq kólemde qanaǵattandyrýdy usyndy. Aıta ketelik, Seıitqazy jáne Áset Mataevtarǵa asa iri kólemdegi búdjet qarajatyn urlady, salyq tóleýden jaltardy degen aıyptar taǵyldy. Sotqa deıingi tergeý nusqasy boıynsha, barlyq qylmystyq áreketterdi qosa eseptegende memleketke 529 mln. teńgeden astam zıan kelgen.
Ámirlan Álimjan
