Almaty oblysy Jambyl aýdanynda qaza bolǵan aǵaıyndy jigitterdiń týystary jerleý rásimi kezinde qoǵamnan qaıǵyly jaǵdaıdy qyzý talqylamaýdy, polıseılerden isti aıaǵyna deıin jetkizýdi surady, - dep habarlaıdy Qamshy.kz.

Almaty oblysynyń kóksý aýdanynda ótken jerleý rásimine marqumdardyń jaqyn týystarynan bólek, aýdan basshylyǵy, basqa qalalardan kelgen azamattar da qatysty.

«Qurmetti baýyrlar, ápke-qaryndastar, Almaty oblysynyń ákimi Amandyq Batalov sizderge kóńil aıtady. Bul bárine ortaq qaıǵy. Qaza bolǵan baýyrlarymyzdy sońǵy saparǵa shyǵaryp salý – bárimizdiń mindetimiz. Sabyr etińizder», – dedi «Nur Otan» partıasy Almaty oblystyq fılıaly tóraǵasynyń birinshi orynbasary Ǵalıasqar Sarybaev.

«Qylmyskerler ustaldy. Olardy jazalaýdy memleket pen quqyq qorǵaý organdary sheshedi. Eki azamat ustaldy. Óz basym olardyń sýretterin de kórdim. Tergeý bir ǵana kúnge sozylmaıdy. Múmkin bir aı ne odan da kóp bolar», – dedi marqumdardyń týysy Erkin Beısekeuly.

Marqumdardyń janazasyna «Nur Otan» partıasy Almaty oblystyń fılıalynyń birinshi orynbasary Ǵalıasqar Sarybaev, oblystyq ishki saıasat basqarmasynyń jetekshisi Rýstam Alpysbaev, Kóksý aýdanynyń ákimi Almas Ádil, ardagerler keńesiniń ókilderi t.b. qatysty.

Eske sala keteıik, ótken jeksenbide BAQ-ta Almaty oblysy Jambyl aýdanynda mal saýdasymen aınalysyp júrgen úsh jigittiń joǵalyp ketkeni týraly habarlanǵan bolatyn.

Marqumdardyń týysqandarynyń aıtýynsha, Doldanuly Jarqynbek (1979 jyly týǵan), Zarlyhanuly Muqıat (1973 jyly týǵan), Álimhan Qadylbek Shyǵys Qazaqstan oblysynyń Tarbaǵataı aýdanynan satyp alǵan 40 bas maldy eki júk kóligimen 17 qyrkúıek kúni Uzynaǵash bazaryna shyǵarǵan. 19 qyrkúıekte sońǵy ret baılanysqa shyqqan.

Birneshe kúnnen keıin olardyń denesi tabyldy. Óltirilgen aǵaıyndylardy ólim aldynda aıýandyqpen qınaǵanyn habarlaǵan edik.