Astanada QR Aýyl sharýashylyǵy mınıstrligi janynan qurylǵan jer zańnamasyn jetildirý jónindegi jumys toby óz qyzmetin tanystyrdy. Osy topqa jetekshilik etetin aýyl shaýashylyǵy vıse-mınıstri Erlan Nysanbaev ázirlenetin jańa zań jobasy jerdi jalǵa alýshylarǵa jaýapkershilik júkteıtinin aıtty, dep habarlaıdy Qamshy.kz BNews.kz- ke silteme jasap.

«Jer qatynastary salasyndaǵy ózara qarym-qatynastyń usynylatyn jańa júıesi azamattyq qoǵamnyń damýyna, jergilikti atqarýshy organdar qyzmetiniń jarıaly bolýyna yqpal etedi.Sondaı-aq, aýyl sharýashylyǵy jerlerin berý prosesterin aqparattandyrýǵa jáne onyń ashyq bolýyna baǵdarlanǵan. Ázirlengen zań jobasy kópshilik talqylaýyna usynylady. Biz ol zańdy qarasha aıynda Parlament májilisine engizýdi josparlap otyrmyz. Jer reformasy jónindegi komısıamen aımaqtardy aralaǵanda, xalyqtyń konkýrs arqyly jerdi jalǵa berýine qarsylyǵyn baıqadym. Óıtkeni, birinshiden ashyqtyq joq. Sondaı-aq qoǵamdyq uıymdar ókilderiniń kirmeýi. Sol sebepti bul jumys tobynyń maqsat – jerdi xalyqqa berýdi retteý», - deıdi Erlan Nysanbaev.

Vıse-mınıstr jer reformasy jónindegi komısıanyń qabyldaǵan usynystary negizge alynatynyn jáne jumys tobyna kimderdiń múshe bolǵanyn aıtyp ótti.

«Konkýrsqa jergilikti atqarýshy organnyń ókilderinen tys, qoǵamdyq uıymdar men ulttyq palata ókilderi mindetti túrde kirýi kerek. Ár jer ýchaskesi boıynsha sheshim qabyldaıtyn kezde jalpy ádiletti bolý jáne ashyq bolý úshin komısıa quramyndaǵy múshelerdiń  50%-y qoǵamdyq uıymdardan jasaqtalady. Jerdi jalǵa alǵandarǵa jaýapkershilik júkteledi.Iaǵnı jerdiń qunarlyǵyn saqtaý qajet. Sondyqtan tıisti organ alǵashqy bes jyl boıy osyny tekserip otyrady. Ol jerge qandaı dándi-daqyl egildi, qalaı paıdalanyp jatyr – barlyǵy qadaǵalanady. Osy zań jobasy jerdi paıdalanýdy jan-jaqty qamtıdy degen oıdamyn»,- dedi ol.