Jańadan taǵaıyndalǵan QR Premer-mınıstri Baqytjan Saǵyntaevtyń tóraǵalyǵymen ótken Úkimet otyrysynda áleýmettik mańyzy bar azyq-túlik taýarlarynyń baǵasyn turaqtandyrý, jumyspen qamtý, memlekettik qyzmet kórsetý sapasyn arttyrý, aldaǵy jylytý maýsymyna daıyndyq jáne egin jınaý naýqany máseleleri talqylanyp, atalǵan Úkimet otyrysy alǵash ret onlaın-rejimde tikeleı kórsetilgendigin atap ótý mańyzdy, - habarlaıdy Qamshy.kz anatili.kazgazeta.kz saıtyna silteme jasap.

Áleýmettik mańyzy bar azyq-túlik taýarlarynyń baǵasyn turaqtandyrý máselesi boıynsha QR Ulttyq ekonomıka mınıstri Qýandyq Bıshimbaev esep berip, jyl basynan beri tutyný baǵasynyń ındeksi 5,4, onyń ishinde azyq-túlik taýarlary 5,2 paıyzǵa óskendigine toqtalyp, azyq-túlik taýarlarynyń qymbattaý sebepterin atap kórsetti. Baǵany retteý úshin jumys júrgizilip jatqandyǵyn, osy rette áleýmettik máni bar taýarlar baǵasynyń ósýine jol bermeý úshin normatıvtik-quqyqtyq bazany jańartýdy usyndy.
Eńbek naryǵyndaǵy jaǵdaıdy, jumyspen qamtý máselesin tilge tıek etken Densaýlyq saqtaý jáne áleýmettik damý mınıstri Tamara Dúısenova «Jumyspen qamtýdyń jol kartasy – 2020» baǵdarlamasynyń jumysyna toqtaldy. Baǵdarlamanyń birinshi baǵyty boıynsha ústimizdegi jyly eldi mekenderde shamamen 39,4 myń jumys ornyn qurý úshin 5096 jobany júzege asyrý kózdelip otyrǵandyǵyn, ekinshi baǵyt aıasynda 794 adam kásipkerlik negizderin úırenýge múmkindik alsa, 5384 adam shaǵyn nesıe alyp, 2975 adam jeke kásibin ashqandyǵyn, úshinshi baǵyt boıynsha 5210 adam kásibin arttyrý úshin tegin oqýǵa múmkindik alǵandyǵyn jetkizdi.
Memlekettik qyzmetterdiń jetildirilýine qatysty sharalar jóninde Aqparat jáne komýnıkasıalar mınıstri Dáýren Abaev sóz alyp, Qazaqstanda memlekettik qyzmetti alýdyń úsh negizgi arnasy: «Elektrondy úkimet» portaly, «Azamattar úshin úkimet» memleket­tik korporasıasy, Memlekettik qyzmetterdi kórsetý máseleleri boıynsha biryńǵaı baılanys ornatý ortalyǵy jóninde baıandady. «Búginde memlekettik qyzmet tiziliminde 739 qyzmet bar, onyń 530-yn «Elektrondy úkimet» jáne memlekettik korporasıa arqyly alýǵa bolady. Jyl sońyna deıin kórsetiletin qyzmetter sany 80 paıyzǵa artyp, 583 memlekettik qyzmetti quraıtyn bolady» dedi D.Abaev.
Egin jınaý naýqany týraly Aýyl sharýashylyǵy vıse-mınıstri Qaırat Aıtýǵanov baıandap, elimizde ta­myzdyń úshinshi onkúndiginen bastap egin jınaý naýqany bastalǵandyǵyn, qazir jumys qarqyndy júrgizilip jatqandyǵyn jetkizdi.
Óz kezeginde QR Premer-mı­nıstri B.Saǵyntaev ár salaǵa qatysty máselelerdi atap ótip, tıisti oryndarǵa tapsyrmalar júktedi.