Elimizde Qazaqstannyń memlekettik táýelsizdigine arnalǵan mádenı-arhıtektýralyq eskertkishter Astanada, Almatyda, oblys ortalyqtary men basqa da eldi mekenderimizde ornatylǵan. Al qasterli táýelsizdigimizge arnalǵan sondaı sáýlet óneri týyndysy shetelde de ashylǵanyn kópshilik bile bermes, dep jazady Aqordanyń baspasóz qyzmeti Feısbýktegi paraqshasynda , - dep habarlaıdy Qamshy.kz  QazAqparat saıtyna silteme jasap. 

«Osydan týra on jyl buryn, 2006 jylǵy 28 qyrkúıekte, Memleket basshysy AQSH-qa resmı sapary aıasynda Vashıngton qalasynda Qazaqstan Respýblıkasy Táýelsizdik monýmentiniń resmı ashylý rásimine qatysty», delingen jazbada.

Sonda Elbasy: «Qazaqstan men AQSH tarıhynda búgin erekshe bir kóńil tolqytatyn kún. Tuńǵysh ret biz Qazaqstannyń Táýelsizdik monýmentin shet elde ashyp otyrmyz. Egemen Qazaqstannyń sımvolyna aınalǵan osy eskertkishtiń AQSH astanasynda boı kótergenin maqtan tutamyz. Halqymyzdyń erkindik pen táýelsizdikke umtylysyn sıpattaıtyn osy tamasha eskertkish Qazaqstan men AQSH-ty berik dostyq, ortaq qundylyqtarǵa negizdelgen strategıalyq áriptestik biriktiretinin bildirip turatyn bolady», - degen edi.

Aqordanyń baspasóz qyzmeti Qazaqstan Prezıdentiniń Vashıngtonda Táýelsizdik monýmentin ashqan sol sátinen túsirilgen fotosýretti oqıǵanyń onjyldyǵyna oraı Feısbýk paıdalanýshylarynyń nazaryna usyndy.