Qazaqstan Respýblıkasy Táýelsizdiginiń 25 jyldyǵyn merekeleýge baılanysty oblys ákimi B.Atamqulovtyń tóraǵalyǵymen 2016 jylǵy 19 qyrkúıekte ótken májiliste aýdandar men qalalarǵa, shalǵaıda ornalasqan eldi mekenderdiń turǵyndaryna mádenı qyzmet kórsetý maqsatynda oblystyq óner mekemeleriniń gastróldik issaparlaryn uıymdastyrýdy tapsyrǵan bolatyn. Osyǵan oraı, 2016 jylǵy 30 qyrkúıek kúni saǵat 15.00-de ákimshilik-iskerlik ortalyǵynyń alańynda «Ónerim saǵan – aýylym» QR Táýelsizdiginiń 25 jyldyǵyna - 25 gastróldik sapar jáne   «Kitaphanalyq  kerýen – 25 aýylǵa» jobasy aıasynda oblystyq 8 kásibı teatr, fılarmonıa, «Ońtústik-Sırk», «Ońtústikfılm» mekemeleri men  oblystyq kitaphanalardy saparǵa shyǵaryp salý saltanaty ótti, - dep habarlaıdy Qamshy.kz.

Búgin «Ónerim saǵan - aýylym» gastróldik saparymen oblystyq ázil-syqaq jáne satıra teatry Túlkibas aýdanynyń Mashat aýylyna, oblystyq qýyrshaq teatry Saıram aýdanynyń Yntymaq aýylyna, Q.Jandarbekov atyndaǵy Jetisaı drama teatry Saryaǵash aýdanynyń Tegisshil, Taskesken, Jartytóbe, Tóńkeris, Qaplanbek aýyldaryna, Túrkistan qalasynyń sazdy-drama teatry Kentaý qalasyna gastróldik saparlaryn bastap, «Kitaphanalyq kerýen – 25 aýylǵa» avtokerýeni Saıram aýdanynyń  Qarabulaq aýylyndaǵy kezdesýmen jalǵasady. Ár mádenıet jáne óner mekemesi oblystyń barlyq aýdandaryndaǵy 25 aýylǵa toqtap, ár aıaldamada spektáklder men konserttik, sırktik baǵdarlamalar, kezdesý keshterin ótkizedi.

Aǵymdaǵy jyldyń jeltoqsan aıyna deıin jalǵasyn tabatyn atalmysh joba, Táýelsizdik kúni merekesi qarsańynda qorytyndylanady.

Saltanatty is-sharaǵa oblys ákiminiń orynbasary Sádibekov Ulasbek Sádibekuly men jazýshy, dramatýrg, Halyqaralyq «Alash» ádebı syılyǵy men «Parasat» ordeniniń ıegeri Marhabat Baıǵut qatysyp, aýyl-elmen júzdesýge attanǵaly turǵan óner ujymdaryna aq jol tilegin bildirdi.