Almaty oblysy Jambyl aýdanynda bolǵan qandy qylmystaǵy jábirlenýshi taraptyń qorǵaýshysy belgili boldy, - dep habarlaıdy Qamshy.kz.

Qylmyskerlerdiń qolynan qaza tapqan Jarqynbek Doldanuly, Muqıat Zarlyhanuly men Qaldybek Álimhanulynyń týystary jábirlenýshi taraptyń qorǵaýshysy retinde advokat Muhtarıma Karbanovany tańdaǵan.

Qorǵaýshy búgin atalǵan is boıynsha tergeýshilermen jolyqqanyn aıtady.

«Qazir tergýshige kirip shyqtym. Tergeýshi osy ýaqytqa deıin qoldanylǵan sharalar týraly aıtyp berdi. İstiń betalysy jaman emes sıaqty. Qazir Almaty oblystyq İshki ister departamenti bastyǵynyń buıryǵymen arnaıy tergeý toby qurylatyny belgili boldy. Osy ispen quramyna birneshe tergeýshi, arnaıy maman kiretin sol top aınalysatyn bolady. Al, iske keler bolsaq, bul óte kúrdeli jaǵdaı bolyp otyr. Qylmys jasaǵanyn moıyndaǵan eki kúdiktiniń bolýyna qaramastan barlyq kýágerlerden jaýap alynýy kerek. Qylmystyń mán-jaıy tolyq zerttelýi tıis. Endi onyń barlyǵy tergeý tobynyń quzyretine kiredi. Jábirlenýshi tarap qorǵaýshysy tergeý aıaqtalǵan soń ǵana is materıaldarymen tanysa alady. Barlyǵyn ýaqyt kórsetedi», - deıdi qorǵaýshy Muhtarıma Karbanova.

M. Karbanova qylmystyq is júrgizý kodeksine saı tergeýdiń eki aı merzimge deıin sozylatynyn, qajettilik týsa tergeý merzimi odan ári uzartylýy múmkin ekenin aıtty.

Esterińizge salsaq, 18 qyrkúıekte Almaty oblysy Jambyl aýdanynda joǵalǵan úsh azamattyń qylmyskerler qolynan qaza tapqany, osy qylmysqa qatysty kúdikti retinde 24 qyrkúıekte eki azamattyń ustalǵany habarlanǵan bolatyn.