Almaty oblysy Jambyl aýdanyndaǵy qandy qylmys shekara beketiniń mańynda bolǵan, - dep habarlaıdy Qamshy.kz.
Bul týraly portal tilshisine qylmys jasalǵan orynǵa arnaıy baryp qaıtqan marqumdardyń týystary men jábirlenýshi taraptyń advokaty Muhtarıma Karbanova aıtyp berdi.
Qylmyskerler qolynan qaza tapqan marqumdardyń týystary men jábirlenýshi taraptyń qorǵaýshysy qylmys ornymen tanysqannan keıin tergeý barysyna, alǵashqy satydaǵy tergeý amaldaryna qatysty suraqtar týǵanyn aıtady.
«Qylmys bolǵan jer «Qastek» shekara beketine jaqyn ornalasqan. Oqıǵa ornyna bara jatqan bizdi de shekarashylar alystan kórip, janymyzǵa keldi. Jón surap, qujattarymyzdy tekserdi. Biz de olardan 18 
qyrkúıektegi oqıǵaǵa qatysty suradyq. Shekarashylar 19 qyrkúıek kúni bir kólikti kórgenin, onyń ishinde úsh-aq adam bolǵanyn aıtty. Muqıat marqumnyń qaltasynda ol kúni jeke qujaty bolmaǵan. Ol buǵan deıin jeke bas kýáliginiń merzimi bitip, jańasyna ótinish bergen. Sonda shekarashylar memlekettik shekaraǵa qujat tekserip ótkizgende ony qalaı ótkizgen? Basqa kýágerler kórdik degen úshinshi kólik qaıda? Budan basqa da suraqtar týady. Úsh azamat óltirilgen oryndardyń arasy 100 metrden aspaıdy. Atylǵan myltyq daýysyn eshkimniń estimeı qalýy múmkin emes. Odan keıin qylmys bolǵan jer júk kóliginiń júrýine óte qolaısyz. Eshkim mundaı jerge óz betinshe aýyr kólikpen kelmeıdi. Jol júrý óte qıyn, kólik aýdarylyp ketýi múmkin. Sondyqtan, qaıtys bolǵan azamattardy qınap ákelgen dep oılaımyz. Tergeýshilerdiń aıtqany men myna jerdegi jaǵdaı úılespeıdi. Máıitterdi shóppen jasyrǵan deıdi. Al, munda ondaı orylǵan shóp joq, qan izderi joq. Biraq, mashınanyń, maldyń kelgen izderi anyq kórinip tur», - deıdi marqumdardyń biriniń týysy Erkin Beısekeı.
Úsh jigittiń týystary sondaı-aq, qylmyskerlerdiń máıitti alyp jasyrmaqshy bolǵan birinshi kóliktiń de quıǵa batpaǵanyn, saıǵa qulaǵanyn anyqtaǵan.
«Jasyramyz dep alyp kele jatyp, aldarynan maldy aýyl shyqqan soń aınalyp qashqan. Sonda kólik saıǵa túsip, keptelip qalǵan. Endi sol jerge kelip kólikti shyǵarýǵa kómektesken traktorısi bar, elektrıgi bar, kýágerler, Úlgili aýylynyń turǵyndary, kúdiktiniń biriniń bóleleri Aıdos, Murat esimdi, burynǵy mılısıa qyzmetkeri delingen kisilerdiń kólik ústindegi máıitterdi kórmeýi múmkin be? Árıne, múmkin emes. Olar bildi», - deıdi E. Beısekeı.
Sondaı-aq, marqumnyń týystary qylmys ornynda tergeýde aıǵaq bolatyn, kóliktiń dóńgelegine tireıtin arnaıy tejegish qural, araq bótelkesi, kilt, basqa da zattardyń sol jerde qalyp ketkenin aıtady.
Joǵalǵan úsh azamatqa tıesili kólikterdiń biri tabylǵan Qansheńgel aýlynyń turǵyny, meıirbıke bop isteıtin Sánıa esimdi kelinshek te órtengen kólik týraly aıtyp bergen. Ol kisi órtengen kólik janynan esh adam kórmegenin, biraq balalary kólikti sóndirýge barǵanda ol jerden bamperi joq «Mersedes» kóligi shańdatyp ótip ketkenin kórgen.
Jábirlenýshi taraptyń advokaty Muhtarıma Karbanova da qylmys ornyna barǵan.
«Arnaıy qylmys ornyna baryp qaıttyq. Maqsat qylmys ornyn óz kózimizben kórip, onda marqumdardyń barǵan jolyn kórý boldy. Kúdiktilerdiń áreketteri týraly buǵan deıin tergeýshiler aıtyp bergen bolatyn. Oqıǵa ornyna bara jatqanda shekarashylar toqtatty. Olarǵa bolǵan jaıdy aıttyq. Olarǵa da suraq qoıdyq. Shekarashylarǵa mal aıdap bara jatqandaryn aıtypty kúdiktiler. Ol týraly shekarashylardyń qyzmet kitapshasynda da jazylǵan eken jáne bir adamda jeke kýálik bolmaǵan. Bul da suraq týǵyzady», -deıdi advokat.
Advokat qylmys ornynyń kólikpen barýǵa óte qolaısyzdyǵyna jáne ol jerdiń mal satatyn, saýdalasatyn jerge uqsamaıtynyn, marqumdardyń ol jerge qandaı sózge senip barýy múmkin ekenine nazar aýdarý kerek dep sanaıdy.
«Joldyń ózi sondaı tar. Kólikpen barý qolaısyz. Olardy kúsh qoldanyp, qorqytyp aparýy múmkin. Bul suraqtardyń barlyǵyn biz tergeý tobyna qoıyp, jaýap alatyn bolamyz», - deıdi advokat M. Karbanova.
Esterińizge salsaq, 18 qyrkúıek kúni Almaty oblysy Jambyl aýdanynda mal satýǵa shyqqan Kóksý aýdanynyń úsh birdeı turǵyny joǵalyp, olardyń qylmyskerler qolynan qaza tapqany 24 qyrkúıek kúni habarlandy. Atalǵan qylmysqa qatysty eki kúdikti qamaýǵa alyndy. Kúdiktiler polısıaǵa ózderiniń úsh azamatty óltirip, maldyń tezegimen kómip ketkenderin aıtqan.
Erlan Tóleýbaı
